Shillong, Jylliew 11
Ka Athletics Federation of India (AFI) kan pynlong ïa ka prokram ban pynkup burom ïa ki nongïalehkai lem bad ki coach nalor kiwei pat, ha ka 20 tarik mynta u bnai ha ka nongbah Delhi.
Ka jingthmu ba kongsan jong kane ka long ban ithuh ïa ka jingtbit ki nongïalehkai ka ri India bad ban pynshlur ïa ki ba kin dangïai bteng ha ki kam ïalehkai jong ki.
Ïa kine ki khusnam la thmu kum ka rynsan ban ai burom ïa ki nongïalehkai kiba mynta bad kiba la rim, ki coach, ki nongtrei ba tbit, ki nonghikai, ki synjuk ïalehkai, ki nongkyrshan, bad baroh kiwei pat kiba ïadon bynta ha ki jingnoh synñiang jong ki ban kyntiew ïa ka ri India kaba kiew ha ka jingïalehkai athletics ha ka pyrthei.
La khmih lynti ba kiba bun na ki nongïalehkai ba paw jong ka ri kiba mynta bad kiba la rim kin don bynta lang ha katei ka prokram. Kum kine ki jingthmu ki don ka bynta kaba kongsan ban kyntiew ïa ki nongïalehkai ka ri.
Kine ki khusnam ba kyrpang ki kynthup ïa ka Lifetime Achievement Award, Best Athlete (Male & Female), Best Coach, Best Technical Official, Best State Association bad Best State Supporting Athletics.
Haba pyrshang ban wad jingtip na ka synjuk ïalehkai jong ka Meghalaya Athletics Association (MAA) la ki don ne em ki nongïalehkai ne coach napoh ka Jylla ki ban shah pynkup burom ha ka AFI, hynrei ka jubab na u Secretary u Bah Finely Lad Pariat u la pynpaw ba um don jingtip eiei.
