Shillong, Jylliew 12
Ka Meghalaya Football Association (MFA) mynta ka sngi Thohdieng jong ka taïew ka la pynlong ïa ka jingïalang pdiang bad pynkup burom ïa arngut ki ‘thei ïalehkai phutbol ka Jylla, kaba wan hadien ka jinglah ban ïoh ïa don bynta lang ka jong ki bad ka kynhun ki ‘thei ïalehkai ka Ri, kaba dang mynha ka taïew kaba la dep, hadien 7 snem ba ka India kala ïoh ban rah ïa ka nam lahduh ha ka lympung ïalehkai ka SAFF Women’s Championship 2026, ba la long ha Goa, hadien ka jinglah ban pynliem ïa ka Bangladesh da 3-1 kol ha ka Final ha ka 6 tarik Jylliew 2026.
Kine ki arngut ki ‘thei ïalehkai ka Jylla kiba la shah pynkup burom ki long ka Sanfida Nongrum bad ka Ribansi Jamu, haba la pynkup burom ïa ki da ka jaiñ tawah thohrew stem, nangta ka synor sah kynmaw (memento), lem bad ka song pisa, kaba la aiti da u President bad Vice President ka MFA u Bah Hamletson Dohling bad Bah Cliff R Nongrum.
La sakhi lang ïa kane ka jingïalang da kiwei pat ki dkhot ka MFA ba kynthup ïa u Bah Dip Ryntathiang Bah Pherlin Rani, Bah Freddy Kharpran bad kiwei-kiwei ki dkhot ka MFA.
Haba kren ha kane ka jingïalang, u pynpaw ba ka MFA ka da dap shisha da ka jingsngewnguh ïa kine ki arngut halor ka jinglah jong ki ban wanrah ïa kat kane ka nam bad ka burom ïa ka Jylla lyngba ka jingdon ka jong ki ha ka kynhun ïalehkai ka Ri.
U Bah Hamlet u la pynkynmaw ba hadien ki bun bun tylli ki snem ba ka India kam pat ju lah ba kan ïoh ban thep ïa ki kol hynrei dei lyngba ka kol ka Sanfida ba la pynpra ïa ka rekod.
Shuh shuh u Bah Hamlet u la ong ban don bynta bad ka kynhun ïalehkai ka Ri kam dei satia ka kam kaba suk lymda trei shitom minot ym don ïa ka ‘discipline’.
Hapoh India ym don ba lah ban poi pyrkhat ba napoh ka Jylla Meghalaya ban mih ka player kaba kum ka Sanfida bad Ribansi bad ka jingïoh ban mihkhmat ka jong kine ki arngut, ka pynpaw shai sha ka pyrthei ba ïaryngkat lang bad kiwei pat ki thei ‘ïalehkai jong kiwei pat ki Jylla.
