Canada, Jylliew:
Ka Canada, ha ka Sngi Balang ka la wanrah ïa kawei ka aiñ rew lane ka ‘Bill’ ban khang noh ïa ki khynnah ba hapoh 16 snem ka rta, na baroh ki rynsan ‘Social Media’ lait noh tang lada kitei ki kompeni jong ki rynsan paidbah, ki la lah shisha ban pyntikna shisha ïa ka jingshngaiñ jong katei ka rynsan naka bynta ki khynnah rit.
Namar la ong ba ka Canada ka la bud ïa ka jingpyrshang jong kiwei pat ki ri ka pyrthei ban pynkhlaiñ ïa ki jingiada ha ki rynsan paidbah khamtam na bynta ki khynnah. Ki heh sorkar ka Canada ki la ong ba ki rynsan Social Media ki lah ban ioh ïa ka jingpyntreikam ba laitluid lada ki la lah ban buh ïa ki lad jingiada kiba biang.
“Ngi pynrem ïa ki khun jong ngi. Ka la biang,” la ong u Marc Miller, u Myntri ka tnat kolshor jong ka Canada. “Ngi donkam ïa ka jingiada kaba kongsan ha ka rukom kaba dei.”
Ka aiñ ka kynthup ïa ki hynñiew jait ki jingthoh kiba pynmynsaw kynthup ïa ki jingthoh kiba pynlong ïa ki khynnah ban pynmynsaw ïalade, ki jingthoh kiba pynmih ïa ka jingïakynad bad pynmih ïa ka jingshun bad ki dur ba ïadei bad ki bym don jingmynjur.
Yn thaw ïa ka nongpyniaid kaba thymmai, kata ka Digital Safety Commission jong ka Canada. Ki kyndon na ka bynta kumno ki jingpyllait kin long yn sa pynbna hadien. U Miller u la ong ba ka jingbuh ïa u nongpyniaid ka lah ban shim por haduh 18 bnai.
U Miller u la ong ba ki platform kin donkam ban pynshisha ba ki long kiba shngain. Yn pynlong ruh ïa ka jingpynshisha ïa ka rta.
Ki ri kiba kynthup ïa ka Australia,Brazil bad Indonesia ki la wanrah ne pynbna ïa ki jingpyrkhing lane ki jingbthah katkum ka rta ïa ki khynnah ba kin ïoh ïa ki social media. Kiwei pat kiba kynthup ïa ka ri Bilat, France, Spain, Denmark, Thailand bad South Korea ki dang pule ne pynwandur ïa ki rukom treikam kiba kum kine.
Ki platform ha Canada kiba ai ïa ki jingthoh na ka bynta ki rangbah kin ym lah ban ioh ïa ka jingpyllait.
Ka aiñ kan pynbeit ruh ïa ki kompeni kiba don shadien jong ki chatbot kiba don ka jingstad thymmai da kaba pynngat ïa ki ïa ka kamram ban leh da ka jingkitkhlieh lyngba ki lad kum ki kyndon ïada ïa ki jingeh.
Ha Australia, ki kompeni social media, ki la weng noh ïa ka jingïoh rung sha kumba 4.7 million tylli ki account, kiba la ithuh ba ki dei ki jong ki khynnah, naduh ba katei ka ri, ka la khang ban pyndonkam ïa ki platform, da kito kiba hapoh 16 snem ka rta, ong ki heh sorkar. Kane ka aiñ ka la pynmih ïa ka jingïatai kaba jur ha Australia halor ka jingpyndonkam ïa ka teknoloji, ka jinglong kyrpang, ka jingïada ïa ki khynnah bad ka jingkoit jingkhiah ha ka bor pyrkhat bad ka la pynlong ïa kiwei pat ki ri ban pyrkhat ïa ki lad ki lynti kiba kum kine.
U heh sorkar Canada, ha ka jingialang bad ki nongthoh khubor, u la ong ba ki bor pyniaid kin pyrshang ban shim jinghikai na Australia.
Ka Lianna McDonald, kaba dei ka nongpynïaid jong ka jaka ai jingïada ïa ki khynnah ha Canada, ka la ïaroh ïa kane ka jingleh, da kaba kdew ba ka jingleh be-ijot ha ki lad pathai khubor ka la kiew bha.
