Shillong, Jylliew 14
Ka Argentima Team-A ha ka sngi Saitjaiñ ka la rah ïa ka nam lahduh ha ka jingïalehkai phutbol ba la tip ka 2nd Malki Open Football Tournament kaba shi sngi ba la pynlong da ka Seng Samla Malki na ka bynta ban kynmaw burom ïa u President ba la khlad noh jong kane ka synjuk na Malki, u (L) Bah Kenedy.
Ka jingïoh ban ïashim bynta ki nongkyrshan ka Argentina ha kane ka lympung, ka dei hadien ba la kut ka jingïaid paidbah ba la pynlong ha ka step jong ka sngi Saitjaiñ kaba dei ka Argentima Messi Fan Club Meghalaya, ban burom ïa u khlur ïalehkai ba paw ka pyrthei u Lionel Messi shuwa ba un shongthaid noh hadien ka World Cup, kumta namar ka jingbym dap ki kynhun ba ïashim bynta, ki nongpynïaid ki la khot sngewbha ïa ki nongkyrshan ka Argentina ban ïalehkai lang.
Te kumta ki nongkyrshan ka Argentina & Messi ki la long ba la kloi ban ïashi bynta ha kane ka lympung kaba shi sngi, kata ka Argentima Team-A bad ka Argentina team-B.
Ha ka jingïalehkai ka Argentina team-B ka la rem noh ha ka quater bad ka Argentina team-A pat ka la jop bad rung sha ka semi final.
Ha ka semi final, ka Argentima Team-A ka la jop biang bad rung sha ka final. Ha ka jingïakhun kaba khatduh ka Argentima Team-A ka la jop sa ïa ka Just For Fun da 1-0 kol na ka bynta ban khur syndon ïa ka nam lahduh.
Te kumta ka Argentima Team-A ka la ïohpdiang ïa ka khusnam pisa kaba T. 5000, kata ka Just For Fun ka la ïoh T. 3000.
Ha katei ka sngi la ïadon lang kiba ha ïing ha sem jong u (L) Bah Kenedy bad ka kurim, ki nongshong shnong ka Malki, u Rangbah Shnong, ka Kong Ampareen Lyngdoh, MLA ka Nongthymmai Konstitwensi, ka Kong Deity Majaw, MDC na Malki bad kiwei.
