Washington, Jylliew:
U President ka United States, u Donald Trump, ha ka taiew ba la dep u la pynbna ïa ka kyrteng jong u Jay Clayton kum u heh ba thymmai jong ka tnat wad bniah ka ri, hadien ka jingiapher jingmut hapdeng ki Republican halor ka jingthmu jong u Trump ban thep da ki nongkyrshan barim jong u hapoh katei ka shuki kaba dang lait thylli.
Ka jingjied jong u Trump ïa u heh sorkar ka tnat kam poh ïing, u Bill Pulte, kum u Director ba shipor jong ka tnat wad bniah jong ka ri, ha kaba sdang jong une u bnai watla um don jingtip ei ei ha ki kam jong ka tnat wad bniah, ka la pynmih ïa ka jingkulmar.
U Clayton u dei u nongiasaid aiñ jong ka US na ka bynta ka Southern District jong ka New York bad u la long ruh u Director jong ka tnat Securities & Exchange Commission ha ka samoi treikam ba nyngkong jong u Trump.
“Nga sngewkmen ban pynbna ïa ka jingjer kyrteng ïa u Jay Clayton uba don burom … ban long u Director ba bud jong ka National Intelligence,” ong u Trump ha ka rynsan ‘Truth Social’ jong u. “Nga pynshlur ïa ka kynhun Senate jong ka ri America ban pynskhem kloi katba lah ïa u Jay.”
U Trump u la kynran dien ha ka jingïakhih jong ka Senate halor ka jingai kyrteng jong u ïa u Pulte. Ka jingïakynad halor u Pulte ka la kut noh ha kaba ka ïing dorbar jong ka US ha ka sngi Thohdieng ka la kyntait ïa ka jingpynjlan por kaba lyngkot ïa ka prokram peitngor kaba heh khlem hukum kum ka jingpyrshah.
Katei ka jingthep vote, ka la hap hapdeng ka jingbitar halor U Pulte, uba dei u khlieh jong ka Federal Housing Finance Agency, u bym don jingtip eiei ha ka kam iada ri bad uba la shah kynnoh ha ki Democrats ba u pyndonkam ïa ki database jong ka sorkar ban wad ïa ki jingtip kiba pynsniew ïa ki nongshun sain pyrthei jong u Trump.
Ki Democrat ki la ong ba kin nym kyrshan wat ïa ka jingpynthymmai shipor khlem ki jingpynkylla ban ïada ïa ka jinglong kyrpang jong ki nong America bad ka jingkynran dien na ka jingpynkiew kyrdan ïa u Pulte. U Trump u la paw mynshwa ba u la pynrem ar shah ïa u Pulte.
U la hukum ïa u Pulte ban ot ïa ki kam ha ka tnat wad bniah jong ka US, da kaba ong ba ka jinglong tang u nongpyniaid ba treikam uba khlem donkam ïa ka jingmynjur jong ka Senate ka mut ba u “kham duna ka jingshah teh mraw.”
Ka director barim jong ka tnat syntiat, ka Tulsi Gabbard, ka la pynbna ha u bnai Naitung, ba ka hiar shuki noh, na ka bynta ban sumar ïa u lok jongka, namar ba u dang ialeh pyrshah ïa ka jingpang cancer.
Ha kaba nyngkong ka la dei ban mih noh ha ka 30 tarik u Jylliew hynrei u Trump u la pynkynriah ïa ka tarik sha ka 19 tarik u Naitung.
