Washington, Jylliew:
U President ka America, u Donald Trump, ha kane ka sien u la thung ia u nongïasaid aiñ ba shimet jong u – u Todd Blanche, kum u heh ka tnat aiñ jong ka US, ha ka nongrim kaba neh, kaba pynlong ïa ka jingïakhun ban pynskhem, kaba lah ban long bad ka kynhun Senate.
U Blanche, uba la don 51 snem ka rta, u la shakri kum u nongïasaid aiñ ba shipor, naduh ba ka Pam Bondi, ka la mih noh ha u bnai Iaiong. Naduh katei ka por u la bud ia ki katto katne ki jingshah kynnoh pyrshah ia ki nongshun saiñ pyrthei jong u Trump.
Ka tnat Justice barim kaba ar ka la ïada ruh da ka jingïakynad ïa ka “slush fund” kaba $1.8 billion ban siew bai lutksan ïa ki paralok saiñpyrthei jong u Trump, kaba ka sorkar ka la weng noh naduh katei ka por.
Ka White House ka la ong ba ka la phah tikna ia ka jingtyrwa jong u Blanche sha ka Senate ha ka jingpynbna kaba la buh ha ka Sngi Nyngkong ha ka website jong u. U Trump, u la ïathuh ha ki nongwan jngohkai ha ka jingïalang bam ja miet jong ka White House Rose Garden, ha ka taiew ba la dep, ba u thmu ban pynmih kyrteng ïa u.
Hynrei ym pat lah ban tip la u Blanche un ïoh ne em ïa ka jingkyrshan kaba biang na ka Senate, kaba hap ban mynjur ïa ki jingpynrung kyrteng jong ki heh sorkar kum u nongïasaid aiñ.
Ki Republican ha ka Congress, ki la pynlong ïa u Trump ïa ki jingeh ha kine ki taiew ba ladep, namar ba ka jingmynjur jong u, ka nang hiar halor ka ïoh ka kot bad ka thma Iran, sa tang san bnai, haduh ka elekshon shiteng samoi kaba kongsan.
Ki la bitar khamtam eh halor ka jingai pisa ba la khot pyrshah ïa ka jingpynmih tiar ïaleh ba la pynbor da u Blanche, kaba la ai jingsiew bai lutksan ïa ki paralok jong u Trump kiba la shah pynngat hapoh ka jingsynshar jong u, u Joe Biden, uba la wan ha shuwa jong u.
Ki Democrat ruh ki la pynrem ia katei ka pisa.
“U Donald Trump, u la don bynta ha ka kam bamsap tam ha ka histori jong ka kam President. U Todd Blanche, kumba ka paw, um shym la tip satia,” la ong u Dick Durbin, uba long u dkhot ba ha khlieh duh jong ka seng Democratic ha ka Senate Judiciary Committee.
