Shillong, Jylliew 14
Ki nongkyrshan ka Australia ki la tuid sha ki surok bad ha Federation Square kaba ha Melbourne, hadien ba ka kynhun ïalehkai katei ka ri ka la khur ïa ka jingjop kaba nyngkong ha ka FIFA World Cup, hadien ba ka la lah ban pynliem noh ïa ka Turkey da 2-0 kol ha ka step jong ka sngi U Blei.
Lyngba ki dur khih kiba la saphriang ha ki rynsan social media la sakhi ïa ka jinglehkmen jong ki paidbah nongkyrshang jong ka bad la khmih lynti ba kan lah ban jam shaduh ka wat kaba 32. Ka Federation Square ka la kylla long ka duriaw kaba la dap da ka rong jyrngam bad rnong lyngba ka jingïamih paidbah da ki hajar ngut ki paidbah kiba ïalehkmen halor kane ka jingjop.
Kane ka jinglehkmen ka long hadien ka jingjop ka Australia ïa ka kynhun ïalehkai ka Turkey ha ka World Cup ha ka sien kaba nyngkong hadien 24 snem. Ka Turkey ka dei ka kynhun kaba la poi shaduh ka semi final ha u snem 2002, hynrei kam shym la ïoh rung sha kane ka lympung, hynrei ka la jam sha kane ka lympung lyngba ka jingjop ï aka Kosovo ha ka ‘playoff’.
Ha kane ka jingïakhun kaba nyngkong jong ka Group-D, u Nestory Irankunda bad u Connor Metcalfe ki la ïoh ban thep kol na ka bynta ka Australia na ka bynta ban khur ïa ki lai poiñ. Kane ka kynhun ka la rung sha ka World Cup hynriew sien lynter bad haba kheiñ lang baroh ka la ïoh rung hynñiew sien.
U rangïalehkai ba dang 20 snem jong ka Watford u Irankunda u la pynkhih jar nyngkong eh ha ka minit kaba 27 bad ïa kawei pat la thep ha ka kylla miet lyngba u Metcalfe (75) na ka bynta ban khur syndon ïa ka jingjop.
Ha kawei ka jingïalehkai jong ka Group-C, ka Scotland ka la pynliem noh ïa ka Haiti da 1-0 kol. Kane ka la wan urlong lyngba ka shi kol ba la thep da u John McGinn ha ka minit kaba 28 na ka bynta ban khur ïa ki lai poiñ.
Ka Brazil ka la ïasam mar shi poiñ bad ka Morocco hadien ba ki la ïakhaid mar 1-1 kol ha ka jingïalehkai jong ka Group-C.
Ka Morocco ka la pynkhih jar nyngkong eh lyngba u Ismael Saibari ha ka minit kaba 21, hynrei hadien shiteng kynta u Vinicius Junior (32) u la lah ban pynphai kylla na ka bynta ka Brazil na ka bynta ban ïakhaid mar shi kol.
U khlur ïalehkai ka Brazil u Neymar u la duh ïalehkai ha kane ka jingïakhun na ka daw ka jingmynsaw ha ki bynta jong ka khohwah ha ka jingkilanmet.
Haba phai sha kawei pat ka jingïakhun jong ka Group-B, ka Qatar ka la lah ban pynïakhaid mar 1-1 kol pyrshah ïa ka Switzerland.
Kane ka la wan urlong lyngba ka jingbakla thep hi u rangïalehkai ka Switzerland u Miro Muheim hashwa ban kut ka jingïalehkai ha ka minit kaba 90+4. Katba na ka liang ka Switzerland ka la pynkhih jar nyngkong eh lyngba ka penalty ba la shut da u Breel Embolo (17).
