Washington, Jylliew:
U President ka United States, u Donald Trump, ha ka Sngi U Blei u la ong ba ka jingïakren ïasuk bad ka Iran ka la dep kut bad ka la sei-soh, ha kaba, u la pyntikna ruh ba ïa ka lynti ïaid jhad ‘Strait of Hormuz’ yn plie beit noh bad ba ka Iran kan sa weng noh shi syndon ïa ki jingpyrkhing pyrshah ïa ki jhad ka America ruh kumjuh. Haba thoh ha ka rynsan ‘Truth Social’ jong u, u Trump u la ong ba ka jingïateh soskular sangeh thma bad ka Islamic Republic of Iran ka la treikam pura mynta bad u la ai khublei ruh ïa baroh ki liang kiba ïadon bynta ha ka jingïarap ban wanrah ïa ka jingïasuk hapdeng ka Iran bad ka US.
“Ka jingïateh bad ka ri Islamic jong ka Iran ka la urlong mynta. Khublei ïa baroh! Nga ai bor pura ban plie khlem jingsiew ïa ka duriaw Hormuz, bad, ha kajuh ka por bad kane, nga ai bor ban weng noh mardor ïa ka jingkhang jong ki shipai duriaw jong ka ri America. Ki lieng jong ka Pyrthei, sdang ïa ki engine jong phi!” la thoh u Trump ha katei ka rynsan. Katei ka kam jong u, ka la mih tang hadien ba ka Pakistan, kaba la trei kum ka nongpynïasuk hapdeng ki arliang mamla, ka la pynthikna ba la ïasoi ïa ka jingïateh.
“Hadien ka jingïakren kaba jur, ngi sngewkmen ban pynbna ba ka jingïateh jingsuk hapdeng ka ri America bad ka ri Islamic of Iran ka la poi. Baroh arliang mamla ki la pynbna ban pynkut noh mardor bad junom ïa ki kam shipai ha baroh ki liang, kynthup ha Lebanon,” la ong u Myntri Rangbahduh jong ka Pakistan, u Shehbaz Sharif.
Ka Iran ka la pynrem kham mynshwa ïa kaei kaba ka Pakistan ka la ong, kaba la buh jingkylli haduh katno ka jingïateh ka long kaba skhem ha ka jingshisha. Ia ki jingtip ba pura halor katei ka jingiateh ym pat lah ban pynmih.
Baroh arliang mamla ki dei ban ïasoi ïa kane ka jingïateh ha ka sngi palei ha Switzerland, la ong u myntri rangbahduh ka ri u Sharif ha ka post jong u. Ym pat lah ban tip lano thik ka Strait Hormuz kan plie biang ïa baroh ki lieng. Kane ka duriaw ka dei kawei na ki lynti kit umphniang kaba bunkam tam ha ka pyrthei bad ka long kum ka jaka khanglad ïa jan shi bynta na ka san bynta jong ka jingpynpoi umphniang bad ka umphniang mariang ha ka pyrthei. Ka Iran ka la khang bha ïa ka lynti um kaba kongsan bha haba ka thma ka la khie ha ka 28 tarik u Rymphang. Nangta ka US ka la pynbna ïa ka jingkhang ïa ki kad liengsuiñ jong ka Iran hadien ba ka jingïakren ïasuk ha Pakistan kam shym la lah satia ban ïoh ïa ka jingjop ha u bnai Risaw.
