Dubai, Jylliew:
U Myntri kam pohïing jong ka Bangladesh ha ka Sngi U Blei, u la ïathuh ba u heh pulit barim jong ka Bangladesh, u Benazir Ahmed, u la shah kem ha Dubai hadien bun snem ba u la phet krad na la ka jong ka ri ha kaba u ïakynduh bun tylli ki jingshah kynnoh ba kynthup ïa ki kam bamsap.
U Benazir, uba long teng u paralok ba jan eh jong ka nongïalam ba rim katei ka ri, ka Sheikh Hasina, u la mih noh na ka ri ha u Jymmang jong u snem 2024 hapdeng ka jingbitar paidbah halor ka jingkynnoh ba u la buh beaiñ ïa ka spah kaba bun klur tyngka.
Ka ri America ka la pynjari da ki jingpynshitom pyrshah ïa une u heh sorkar ha u snem 2021 namar ka jingkynnoh ba u la don bynta ha ki spah ngut ki jingjah bad ki jingpynïap khlem akor haba u la ïalam ïa ka kynhun shipai Rapid Action Battalion kaba la sheptieng bha. “U Benazir Ahmed u la shah kem ha ka 12 tarik u Jylliew bad yn sa pynphai noh shen ïa u,” la ong u myntri kam poh ïing ka Bangladesh u Salahuddin Ahmed ha ka parliament.
“La pynmih ïa ka Interpol Red Notice pyrshah ïa u Benazir,” u la bynrap.
“Kane ka dei ka jingjop kaba sah ha ka histori. Lyngba kine ki jingpyrshang, ngin sa lah ban pynpra ïa ka kolshor jong ka jingbym shah pynshitom,” la ong u Salahuddin Ahmed.
“Ngi kwah ban pynthikna ïa ka jaitbynriew ba ym don u nongleh kam sniew, wat la u donbor katno katno ruh, uba don halor ka aiñ.”
Ka jingïakhih ba la ïalam da ki samla pule ka la pynhap noh ïa ka myntri rangbah duh ka Sheikh Hasina ha u Nailar 2024, kaba la pynbor ïa ka ban leit beh shnong.
