Shillong, Jylliew 16
Ka PFR Football Academy ka la pynbna ba ka ‘thei ïalehkai kane ka shlem ai jinghikai, ka Mefy Naki Nongrum, ka la shah jied ban ïoh ka jingshah hikai pyntbit hapoh ka AIFF FIFA Talent Academy.
Ka Mefy kaba dang 15 snem ka rta, ka la ïoh ban mihkhmat ha ka sien kaba nyngkong eh ha ka kynhun ïalehkai senior ha ka Meghalaya Women’s State League 2025 bad ka la shim bynta ruh ha ka Women’s Football League 2025 ba la pynïaid da ka Shillong Sports Association.
Kumba ka paw kane ka long ka sien kaba ar ba katei ka shlem ai jinghikai jong ka PFR ba ka la lah ban sei na ki ‘thei ïalehkai ki ban rung sha ka prokram kilanmet jong ka ri bad kaba nyngkong ka dei ka Phibandamy.
Ka la rung sha ka shlem ai jinghikai jong ka PFR na ka bynta saw snem, ha ka rta ba ka dang don ha ka rta kaba 11 snem bad ka la sdang ban kiew ha ka rukom ïalehkai hapoh ka jingïalam ki coach kiba kynthup ïa u Bah Jeffrey S. Massar bad Bah Tyngshaiñ Kharlyngdoh.
