Shillong, Jylliew 16
U coach ka kynhun ïalehkai World Cup ka Iran, u la ong ba la bthah ïa ka kynhun ban mih noh na U.S. bad ban leit phai biang sha ka jaka kilanmet jong ka sha Mexico tang hadien katto katne kynta hadien ba la kut ka jingïalehkai kaba nyngkong ha kaba ka la ïakhaid mar 2-2 kol bad ka New Zealand ha ka step jong ka sngi Ba-ar.
U Coach kane ka kynhun u Amir Ghalenoei um shym la ong mano ba bthah ïa ki ban mih noh kham kloi ban ïa kaba ki thmu. Ha ka jingshisha kane ka kynhun ka la khmih lynti ban pynlut ïa ka miet ha California khnang ban pynïoh bor ïa kane kynhun hadien ba la kut ka jingïalehkai ba nyngkong jong ka, hynrei la bthah ïa ki ba baroh ki dei ban kiew mardor ha ka liengsuiñ na ka bynta ban leit sha Tijuana kaba jngai 140 mile.
“Kim shym la ai por ruh ïa ngi ban ïohbor”, la ong u Ghalenoei lyngba u nongpynkylla ktien. “Hadien ka jingïalehkai mynta ka sngi, ki la ong ïa ngi, ‘Phi hap ban mih noh mardor.’ Ka long kaba kongsan bha ïa ngi ban ïoh por khnang ban ïoh bor, hynrei la kyrpad ïa ngi ban kiew ha ka liengsuiñ bad ban leit phai sha Tijuana, bad ngi la sngew shem jingeh shisha halor kane ka jingbthah.”
Ka jingïalehkai World Cup jong ka Iran ka la long kaba eh bha naduh ba ka U.S. bad ka Israel ki la sdang ïa ka jinghiar thma pyrshah ïa ka Iran ha ka 28 tarik u Rymphang. Ha kaba kut ka Iran ka la rai ban ïakhun wat hadien ba ka FIFA ka la kyntait ïa ka jingkyrpad jong ka ban pynkynriah noh ïa ki lai tylli ki jingïalehkai jong ka shabar na ka ri U.S.
“Ngim tip balei ki pynphai biang ïa ngi”, la ong u Ghalenoei. “Nga tharai ba ka long kaba phylla shibun. Ka rai kaba ki la shim pyrshah ïa ngi ka long kumba ka la wan nawei pat. Ha ka jingshisha ngi la dei ban wan ar miet shwa ka jingïalehkai, bad ngi la dei ban sah mynta ka miet khnang ban ïoh bor bad ban leit phai lashai ka sngi ha ka por mynsngi. Ngim don jingtip balei ki la shim rai kyrkieh ïa ngi.”
“Nga tharai ba ka kynhun jong ngi ka long lehse kaba shah pynshitom beiñ tam ha ka World Cup.”
Ka Iran kan pynkhreh ïa ka jingïalehkai kaba ar ha SoFi Stadium pyrshah ïa ka Belgium ha ka sngi U Blei.
