Shillong, Jylliew 16
Ka tnat ïalehkai jong ka Sorkar Jylla ka la pynlong ïa ka Sports Conclave 2026 ha ka sngi Ba-ar ha Courtyard by Marriott, Shillong ha kaba la wan shim bynta da ki khlur ïalehkai jong ka ri bad kane ka prokram ka long shi bynta ban pynkhreh ïa ka 39th National Games 2027 ka ban long ha kane ka Jylla.
Kine ki kynthup ïa ka khlur ïalehkai siat suloi ka Manu Bhaker kaba la khur takma ha Olympics, u Abhinav Bindra uba long u nongseng ïa ka Abhinav Bindra Foundation, ka Sheetal Devi kaba long ka lahduh ha ka World Para Archery, u khlur ïalehkai hockey u P.R Sreejesh uba ïadon bynta ban khur takma ha ka Olympic bad ka nongïalehkai athletics ka Hima Das bad ka la ïohpdiang ïa ka khusnam Arjuna.
Ha kane ka jingïalang la ïadon lang u Myntri Rangbah ka Jylla u Conrad K. Sangma kum u kongsan, kumjuh u Myntri ka tnat ïalehkai u Bah Wailadmiki Shylla kum u symbud kongsan ryngkat ki heh ophisar ba kynthup naduh u Chief Secretary ka Jylla u Dr. Shakil P. Ahammed bad kiwei kiwei.
Ha kane ka sngi la ïadon lang ki nongïalam na ka Meghalaya State Olympic Association, ki nongmihkhmat na ki synjuk ïalehkai, ki nongïalehkai, u Dr. Adille Sumariwalla, Vice President ka World Athletics bad ka Deepthi Bopaiah, Board Member-Go Sports Foundation nalor kiwei pat.
Haba pynpaw ha kane ka sngi, u Vice President ka World Athletics u Dr. Adille Sumariwalla u la pynpaw ba tang ka jingïamir jingmut kam pat biang, hynrei donkam ïa ka jingtrei shitom na ka bynta ban khur takma ha ki lympung ïalehkai bad u la ong ba ka Meghalaya ka sdang ban kiew khyndiat ha ki jingïalehkai.
“Ha ki lai tylli ki National Games ba la lah, ka Meghalaya kam shym la khur wat tang kawei ka takma. Hynrei ha ka National Games 2025 kaba la long ha Uttarakhand, ka la khur 5 tylli ki takma, kaba kynthup ïa kawei ka takma ksiar, ar ki takma rupa bad ar ki takma rnong. Kane ka dei ka jingjam kaba tang khyndiat eh.”
Ha ka Khelo India Youth Games 2026, ka la khur 4 tylli ki takma. Kine ki kynthup ïa ar tylli ki takma ksiar ha ka kynhun jong ka Compound Archery ki shynrang bad kynthei. Katba ïa ki takma rnong la khur da ki nongïalehkai rah nar ne weightlifting bad wrestling.
Te kumta u la ong ba ka Jylla ka donkam ïa ka jingshim bynta khnang ba kan lah ban khur takma ha ki lympung ïalehkai khamtam ha ka National Games 2027 ka ban long ha kane ka Jylla.
