Texas, Jylliew:
Kawei ka longkmie 76 snem ka rta, ka la duh ei noh ïa ka jingim jongka, hadien ba kawei ka kali ‘Tesla’ ba khlem nongñiah, ka la leit tur beit- beit sha ka iingsah jongka ha ka Sngi Thohdieng, kata; ka 19 tarik u Jylliew. La ong ba u nongñiah jong katei ka kali bym donkam nongñiah, u Michael Butler, u don ha katei ka kali ‘Tesla Model 3’, bad u ñiah ïa katei ka kali ha ka por kumba 8 baje jan miet ahpoh Katy, jong ka nongbah Texas, kumba 30 mer ka jingjngai na ka phang West jong ka nongbah Houston, ha kaba katei ka kali ka la leit tur beit- beit sha katei ka iingsah jong katei ka briew ha ka jingstet kaba jur bha bad la ong ba katei ka jingleit tur jong katei ka kali, ka la ioh pynpra ïa ki kynroh ïing jong katei ka ïing bad ka la ioh rat tyngeh ruh ïa katei ka briew kaba don hapoh. Ia katei ka briew, la ithuh kum ka Martha Avila, kaba la don 76 snem ka rta.
U Butler, u ñiah ïa katei ka kali “da ka rukom pynsuk ba kan shu ïaid hi dalade,” la bynrap biang ka Ophis jong u Sheriff, katkum ka khubor ba la pynmih ha ka kotkhubor The New York Times. Katei ka Tesla, ka la lynshop ïa ka kynroh brick bad ka la tynrah ïa ka Avila, ïa kaba la rah da ka helicopter sumar sha kawei ka jaka sumar, ha kaba hadien la pynbna ba ka la khlad noh.
Ka khun jong ka Avila, ka Jennifer Barbour, ka la buh ïa ka video kaba la shim na ki CCTV jong katei ka jingjia aksiden, ha ka Facebook profile jongka, ha kaba ka la ong ba ka kmie jongka, kam dei hok ban ioh ïa katei ka jingjia.
“Une u dei u nongñiah ïa ka Tesla kaba her sha ka ïing jong nga. I mei jong nga im dei hok ban mad ïa kum kane” ong ka Barbour bad bynrap ba ka jingim jong ka kmie jong ka ka la shah ot lyngkot.
“Ka kmie jong nga ka long kaba sngewrit bad kaba sngewtynnad bha. Ka la long kaba koit ba khiah bha, ka la dap 76 snem ka rta, khlem dawai, khlem da dih ei ei, kam don jingeh ha ka koit ka khiah. Ka la lah ban poi sha ka 100 snem kum ka kmie tymmen jong nga,” la ong u Barbour ha ki nongthohk khubor.
Ka Avila ka dang ïeng ha ka kamra ba shakhmat jong ka ïing haba ka kali ka la rung shapoh, katba ym shym la iohi dak eieir uh ba u Butler u la dih kyiad bad u la iatreilang ha ka jingtohkit kaba dang iaid shakhmat.
La thaw ïa ka GoFundMe page hadien katei ka jingjia ban kyrshan ïa ka ïing ka sem jong ka Avila, kaba la hap ban wad jaka sah shipor.
“Ka ïing [jong ngi] mynta kam lah ban shong bad ka don hapoh ka jingtohkit, kaba pynbor ïa ka longïing jong ngi ban sah ha ki ïing ba shipor katba ki dang ïakhun ïa kane ka jingduh kaba ym lah ban mutdur,” la pule ha ka sla GoFundMe.
“Ngi dang lum pisa ban iarap ban siew ïa ki jinglut jingsep ha ka jingim ba kyrkieh, ki jinglut jingsep ha ka jingleit ontep, bad ka jingtei biang katba ka ïing ka sem jong ngi ka sdang ban koit.”
Watla ka Autopilot jong ka Tesla ka dei ka kor kaba pawnam bha kaba iarap ïa ki nongniah kali, hynrei ka la iakynduh ïa ki jingeh ha ka jingtreikam kaba ju jia man ka por ha kine ki snem. Khnang ban lait na ki jingma kiba iadei bad kane, ki kot jinghikai jong ki trai kali jong ka Tesla ki bthah shai ïa ki nongniah kali ban bat ïa ki kti jong ki ha ka tyrpeng bad ban long kiba la pynkhreh ban shim ïa ka jingsynshar ha ka por ba don jingeh.
