Shillong, Jylliew 22
Ka Meghalaya Triathlon Association (MTA) ha ka 15 tarik mynta u bnai ka la sdang ban lum ban lang ïa ki ‘thei bad ki ‘rang ïalehkai kiba don ïa ka jingnang jingtip ha ka jingïalehkai ‘Triathlon’ na ka bynta ban ïamir jingmut bad kumjuh ban peit thuh ïa ka jingdon sap ka jong ki ha kane ka jingïalehkai.
Ka ‘Triathlon’ ka dei kawei na ki jingïalehkai kaba don ha ka thup jong ka Olympics bad kumjuh ruh ha ka National Games jong ka Ri. Kane ka jingïalehkai ka don lai bynta. Ha kaba sdang ka don ka jingïajngi, bud pat sa ka jingñiah ‘cycle’ bad ka bynta kaba khatduh ka dei ka jingmareh. Ïa kine ki lai tylli hap ban pyndep kawei hadien kawei pat ha kajuh ka sngi.
Ki don la ki jong ki jong ki jingjngai ha kaba ïadei bad ka jingjngi, jingñiah ‘cycle’ bad jingmareh. Ha ka National Games ha ka Ri, ki ju pynlong ïa ka jingjngi kaba 750 metre, jingñiah ‘cycle’ kaba 20 km bad jingmareh kaba 5 km. Kane ka long kawei na ki jingïalehkai kaba eh tam namar ka don lai tylli kiba hap ban pyndep kawei hadien kawei pat.
Ha ka Sngi Saitjaiñ jong ka taïew ba la lah, ka MTA ka la lum la lang ïa ki ‘thei bad ki ‘rang ïalehkai ha ka lympung ‘4 For All’ ha Diengïong na ka bynta ka jingjngi. Ki la don palat 30 ngut ki nongïashim bynta ha ka rta bapher-bapher. Ka jingjngi ha katei ka sngi ka long na ka bynta 400 mitar.
Ha ka Lah Sngi U Blei pat, ka MTA ka la pynlong sa ka jingñiah ‘cycle’ kaba 20 km bad ka jingmareh kaba 5 km ha ka thaiñ New Shillong ha kaba la wan ban ïashim bynta da ki nongïalehkai kiba don bynta ha ka jingïajngi ha ka Sngi Saitjaiñ bad sa katto kane kiwei pat.
Na ka liang ka President jong ka MTA, ka Kong Rephica Pde, ka la ïathuh ba kane ka jinglum jinglang ïa ki nongïalehkai ka dei tang ka jingsdang jong ka jingïaid lynti ban pynkhreh ïa ki ‘thei bad ki ‘rang kiba don ïa ka sap bad ka jingtbit ha ka jingïalehkai ‘Triathlon’ khnang ba kin lah ban leit ïashim bynta ha ki jingïakhun bapher-bapher kiba ju long na ka por sha ka por.
Ka Kong Rephica ka la ïathuh ba ka jingwad ïa ki nongïalehkai ‘Triathlon’ lane kita ki ‘Triathlete’ kan dang ïaid tad haduh ban da lah ban jied ïa kita ki ‘thei bad ki ‘rang bakynsai ki ban lah ban mihkhmat ïa ka Jylla ha ki lympung jingïakhun bapher-bapher.
Kane ka nongïalam jong ka MTA ka la ai khublei ïa ki ‘thei bad ki ‘rang ïalehkai kiba la wan mih ha ka Sngi Saitjaiñ bad ha ka Lah Sngi U Blei bad kiba la pyni ïa la ka jingtbit. Ka Kong Rephica ka la ong ba watla kane ka jingïalehkai ka long kawei na kiba eh tam, hynrei ka kyrmen ba ka MTA kan sa lah ban sei ïa ki ‘thei bad ki ‘rang bakynsai.
“Ngi dang kham duna ha ka jingdon jong kiba kum kine ki nongïalehkai ha ka jylla, hynrei ha kine ki ar sngi, ngi la shem ba ki don kita kiba don ïa ka jingtbit, jingkhlaiñ bad ka jinglah ban ïai neh watla ki dang donkam ïa ka jingshah btin lynti, jingshah hikai, jingkilan met,” la ong ka President ka MTA.
