Jordan, Jylliew:
Ka Jordan ha ka Sngi U Blei, la ong ba ka la sdien phasi ïa 6 ngut ki nongleh kam sniew kiba don kti ha ka jingthombor bad pyniap ïa ki bor pahara jong katei ka ri ha ki por ba la leit. Kane ka rai phasi, la ong ba ka la pynkut noh ïa ka aiñ pynshitom ba ju pyntreikam ha ki por ba la leit, ha kaba, ki ju set patok 9 snem ïa kito kiba don kti ha kum kitei ki jait kam.
U nongaiktien jong ka sorkar, u Mohammad Momani, u la ong ha ka kyrwoh ba kitei ki rangbah ki la shah rai pynrem ha ki “kam lehnoh bad ki kam runar” kiba la pynlong ïa ki pulit ophisar bad ki shipai ban iap bad mynsaw.
Arngut na kitei ki briew ki dei kiba donkti ha ka mukotduma jong u snem 2018 ha ka nongbah Salt, ha kaba 6ngut ki ophisar pahara ki la shah pyniap ha ka por ba ki khynra.
Uwei pat u la shah rai pynrem namar ka jingpyniap ïa u heh pulit ha ka por ba don ki jingiakhih halor ka dor umphniang ha u snem 2022.
Kiwei pat ki la shah rai pynrem ha ki mukotduma kiba ïadei bad u drok ha kaba ki ophisar pahara ki la ïap ha ki jingïakynad da ki tiar hapdeng u snem 2014 bad 2018.
U Momani u la ong ba palat 100 ngut ki briew ki dang don ha ka jingshah set phatok ha Jordan bad ba ki jingpyniap kin iaid shakhmat “kawei hadien kawei”.
U la bynrap ba ïa ki jingpynshitom la pynlong ban pynpoi ïa ka hok “na ka bynta kito kiba la ïap ban ïada” ïa ka ri.
Ka Jordan ka pyndonkam ïa ka jingpynshitom iap da kaba rit, khamtam ha ki mukotduma kiba iadei bad ki kam lehnoh bad ki kam runar kiba shyrkhei, bad kaba khatduh eh ka la pyniap ïa 15 ngut ha u snem 2017.
