Shillong, Jylliew 22
Ka Brazil ka la pynthikna ba u rangïalehkai shakhmat jong ka, u Raphinha u la mynsaw ha ki bynta jong ki ksah ka kjat ka mon ha kaba kane ka la ktah ïa kane ka kynhun hapoh ka jingïalam u Carlo Ancelotti ha ka lympung ïalehkai FIFA World Cup 2026.
Une u rangïalehkai shakhmat ka Barcelona un duh ïalehkai na ka bynta ka Brazil ha ka jingïakhun ka ban wan jong ka Group-C pyrshah ïa ka Scotland, hynrei un ïai sah bad ka kynhun namar u dangïai khmih lynti ban wanphai biang sha ki jingïakhun jong kane ka lympung.
Na ka liang ka Brazilian Football Confederation (CBF) ka la pynpaw lyngba ki tes ha kaba la lap ïa ka jingmynsaw u Raphinha hadien ba ka Brazil ka la jop da 3-0 kol pyrshah ïa ka Haiti. Une u rangïalehkai ba dang 29 snem ka rta u la mad ïaka jingeh ha ka liang ka kjat kamon bad ban hap ban pynshong noh ïa u hashwa ban kut ka kylla step.
Mynta u Raphinha u la sdang ban ïoh bor biang na ka jingmynsaw lyngba ka jingsumar ki doctor ka koit ka khiah jong ka Brazil. Ki bor ba dei khmih jong ka kynhun ki la rai ban pynsah ïa u bad ka kynhun ban ïa kaba phah biang ïa u sha ka klob jong u, da ka jingkyrmen ba un lah ha ka ban wanphai biang na ka bynta ka wat jingïakhun ban wan jong ka Brazil.
U Ancelotti, ha kajuh ka por, u la shaniah ha ka jingstet jong u Raphinha, na ka bynta ban ïada ïa ka kynhun. Utei u nongïalehkai u la don ka bynta kaba kongsan ha ki jingthmu jong ka Brazil ban leit sha kane ka lympung bad ka jingbym lah ban ïadon lang jong u ka la pynlong ïa ki nonghikai ba kin hap ban shim ïa ka rai na ka bynta ban jied da kiwei pat ki rangïalehkai hashwa ka jingïaleh-kai jong ka Scotland.
Kane ka khubor ka wan ha ka por kaba eh bha na ka bynta ka Brazil. Katba u Raphinha u la hap ban duh ïalehkai, kane ka kynhun ka la ïoh jing -kyrmen ha kaba u Neymar u la nangïoh bor na ka jingmynsaw ka jong u.
U Ancelotti u la pyni dak ba u Neymar u la jan ban wanphai biang sha ka jingkilan met bad u lah ban mih madan ha ka jingïakhun pyrshah ïa ka Scotland. Mynta, namar ba u Raphinha um don shuh ha ka jingïalehkai, utei u rangïalehkai ba shakhmat jong ka Santos u lah ban rung sha ka thup jong ki 11 ngut ki rangïalehkai.
Mynta ka Brazil ka dang pynleit jingmut ban ïoh rung sha kawei pat ka wat jingïakhun (knockout), ha kaba ka jingïalehkai jong ka Scotland kan dei kaba khatduh jong ki ha kane ka lympung. Ha ka jingïakhun kaba nyngkong, ka Brazil ka la ïakhaid mar 1-1 kol bad ka Morocco, hynrei ka la wanphai da ka jingjop ïa ka Haiti da 3-0 kol.
