Shillong, Jylliew 23
U kapten barim ka India, u Rohit Sharma, u la ïohpdiang sa kawei ka khusnam hadien ba u la shah pynkup burom da ka khusnam Padma Shri, kaba long kawei na ki khusnam paidbah kaba heh tam jong ka ri, na ka bynta ka jingnoh synñiang kaba khraw jong u ha ka jingïalehkai kriket.
Ïa kane la pynkhamti da ka President ka Droupadi Murmu ha ka jingïalang kaba ar jong ka Civil Investiture kaba la long ha Rashtrapati Bhavan ha New Delhi ha ka sngi Ba-ar. Ka jingithuh ïa u Rohit ka wan hadien ka jingïalehkai kaba la pynlong ïa u ban pynskhem ïa lade kum uwei na ki nongtied bad kum u kapten jong ka India ha ki lympung ïalehkai bapher bapher.
Une u rangïalehkai kriket ba la kha ha Mumbai u la don bynta ban khur jingjop ha ki lympung ïalehkai kriket, ha kaba u la ïalam ïa ka kynhun ïalehkai ka ri sha ka nam lahduh jong ka ICC T20 World Cup ha Barbados ha u snem 2024 shwa ba un ïalam ïa ki sha ka burom jong ka Champions Trophy ha Dubai ha u snem ba bud. Kita ki jingjop ki la pynskhem shuh shuh ïa ka jinglong jong u hapdeng ki nongïalam kiba tbit tam jong ka ri India.
Ka jingkhur rekod u Rohit ha ka ODI ka dangïai sah napdeng kiba kynsai ha ka kriket jong ka pyrthei. Ha ki 285 tylli ki jingïalehkai, u la kamai 11,720 ron ha ka average kaba 48.83 bad 92.97. Ki jingjop jong u ha ka rukom ïalehkai ki kynthup ïa ka jingïoh ïa ka rekod ha ka pyrthei kaba long 264 bad ka jingïoh ïa ki ar tylli ki spah run, ki mawjam kiba dangïai bteng ban batai ïa ka pateng jong u.
Ha ka jingïalehkai Test, u Rohit u la mih madan nyngkong ha u snem 2013 bad u la mihkhmat ïa ka India ha ki 67 tylli ki jingïakhun. U la kamai 4,301 ron, kynthup ïa ki 12 tylli ki spah run bad 18 tylli ki shiteng spah run, da kaba kamai 212 ron ha ka jingim jong u pyrshah ïa ka South Africa ha u snem 2019. Ha u Jymmang jong u snem 2025 u la shongthait noh na ka jingïalehkai Test.
Une u nongtied ba la rim u la ïoh ban shim bynta ha ka jingïalehkai T20I. U la mihkhmat nyngkong na ka bynta ka India ha u snem 2007, u la pyndep ïa ka jingïalehkai jong u ha ka T20I da kaba kamai 4,231 ron na ki 159 tylli ki jingïalehkai. U Rohit u la long u nongïalehkai kriket ba nyngkong eh ban ïalehkai palat 150 tylli ki T20I.
Ha ka jingïalehkai T20I, u la pynkut noh da kaba u la lah ban pynlong ïa ka India ban rah ïa ka nam lahduh ha ka T20 World Cup 2024. Naduh ba u la don bynta hapoh ka kynhun ïalehkai jong u snem 2007, u Rohit u la kylla long uwei na ki nongïalehkai ba kynsai da kaba u la lah ban pynlong ban khur ïa ka jingjop kum u rangïalehkai bad kum u kapten. Kham hadien ba la jop ïa ka nam lahduh, u la pynbna ba un shongthait noh na ki jingïalehkai T20.
Ïa ka khusnam Padma 2026, la sakhi ba ka President ka la pynkup burom sha ki 65 ngut ha ka wat kaba ar hadien a la dep ban bishar bniah. Kine ki kynthup ïa ar ngut kiba la ïoh ïa ka Padma Vibhushan, hynñiew ngut ïa ka Padma Bhushan bad 56 ngut ïa ka Padma Shri. Kham hashwa ki la don 66 kiba la ïohpdiang ïa ka khusnam Padma ha kaba la sam ha ka 26 tarik u Jymmang.
