Shillong, Jylliew 23
Ka Jylla ka lah ban don hapdeng ka jingeh kaba khraw ha kaba kan ym lah ban pynlong ïa ki jingïa-lehkai ha la ïing jong ka Ranji Trophy mynta ka aïom na ka daw ki kynrum kynram kiba la mih hapoh ka synjuk ïalehkai jong ka Meghalaya Cricket Asso-ciation (MCA) naduh ka jingwan shimti u James Sangma kum u President kaba la ktah ïa ka jingpynkhreh jong kane ka lympung.
Haba ïakren bad ki nongthoh khubor ha ka sngi Ba-ar, ki nongïalam ka Shillong Cricket Asso-ciation (SCA) hapoh ka jing-ïalam jong u Bah Peter Mac Donald Kharsa-wiang, kumjuh u Bah Macky Blah, Treasurer, Bah Alex Lynser bad u Supriyo Dhar, Vice President ki pynpaw ba ka jingïapyni bor hapdeng u nongïalam ka MCA u James P.K Sangma bad kiwei pat ki para dkhot, ka la ktah jur ym tang ïa katei ka synjuk, hynrei wat ïa kiwei pat ki synjuk ïalehkai kriket ba don ha manla ki distrik kiba don ha ka Jylla.
“Mynta la jan dap pura 7 bnai kynthih, ym shym la don satia kino kino ki kam kiba dei ban ïaid shakhmat naduh ka jingduh ban pynlong ïa ka Inter District Cricket Tour-nament, kaba dei ka lympung ka ban sei ïa ki nongïalehkai kiba kynsai ki ban mihkhmat ïa ka Jylla sha ki lympung ïaleh-kai jong ka BCCI,” la ong u Bah Mac Donald da kaba pynpaw ruh ba ka mat kaba ar ka dei ka jingbhah pisa kaba juh dei ban ïoh na ka MCA haduh mynta ruh khlem lah ban ïoh.
“Kawei kaba ngi kham sngwkhia ka long halor ka madan, kaba haduh mynta ruh la shu ïeh shrah kaba mynta ka la jan long kum ka madan kaba don ha khlaw, ha kaba la san bha da ki phlang khlaw. Ka daw jong kane ka dei namar ba ka MCA kam lah ban ai pisa na ka bynta ban maramot pynbha ïa ka namar ba kam lah ba kan sei ïa ka pisa.”
Kaba kham pynsngewkhia ïa kine ki nongïalam ka SCA ka long ba kim tip kaei ka ban jia ha kane ka samoi ïalehkai kriket ba mynta la ka BCCI kan wan ne em ban pynlong ïa ki lympung ïalehkai jong ka, kumba ka la ju pynlong ha ki sngi bad ki samoi ïalehkai kiba la lah, namar u Naitung u ban wan un dei u bnai ba ka BCCI kan phah ïa la ki jong ki briew ba kin wan ban khmih ïa ka jinglong jingman jong ka madan bad lada ki lap ba kam long kaba paka, lehse kan long ka jingduhnong ïa ka Jylla ba kan pynlong ïa la ki lympung ïalehkai ha la ïing mynta ka samoi.
Kawei kaba kham sngewkhia ka long ïa ki nongtrei (supports staff) jong ka MCA kiba mynta la jan dap 6 -7 bnai kynthih ba kim shym ïoh satia ïa ka tulop ne ka jingsiew pisa bad kane ka syriem kumjuh wat ïa ki nongtrei ki bym ïoh ïa ka tulop, na ka daw bym lah ban sei ïa ka pisa na ka bank namar ka huri hura hapdeng u Presi-dent, uba kwah ban soi ar ngut ha ka jaka lai ngut kumba ka ju long ha ki snem ba la leit.
Nalor kata ka mih sa ka jingthung ïa ka Cricket Advisory Committee (CAC) kaba la kynnoh ba la thung da u President marwei ki bym dei satia ki dkhot jong ki distrik, kaba hangne la kynnoh ba dei ka jingthung da ki briew kiba shu kynshoit na sha lyndet.
Lah ban kdew ba ha ka apex council don 6 ngut ki dkhot ba la shah jied kaba hangne u President u sah marwei, katba na ka liang u Secretary bad ka kynhun jong u ki don 5 ngut, kiba la shong syndon da ka jingïalang ban rai pynduh pyndam ïa ka CAC bad ban pyntip ruh sha ka BCCI.
Pynban ka SCA bad kiwei pat ki synjuk ïalehkai ki don mynta ha ka umdum namar ïano yn ngeit la ïa u President ne ïa u Secretary.
