Shillong, Jylliew 24
Ka khubor ba bha na bynta u khlur ba pawnam jong ka Brazil u Neymar Jr. hadien ba u la duh ïa ki ar tylli ki jingïakhun jong ka kynhun ha ka World Cup namar ka jingmynsaw ha ka kjat, u Carlo Ancelotti, u coach u la pynthikna ba une u ‘rangïalehkai shakhmat ba 34 snem ka rta, u la wanphai biang sha ka jingkilan met kaba pura bad u lah ban shah jied na ka bynta ka jingïakhun kaba radbah mynta ka sngi pyrshah ïa ka Scotland.
U Neymar u la shah pynduh noh ban lehkai namar ka jingmynsaw ha ka kjat kaba u la mad ha u bnai Jymmang, kaba la pynlong ïa u ban nym lah ban don bynta ha ka jingïalehkai jong ka Brazil bad ka Morocco kaba la ïakhaid da 1-1 kol bad ban jop pyrshah ïa ka Haiti da 3-0 kol.
Ka Brazil ka donkam ïa ka result kaba khlaiñ ban pynïoh ïa ka kyrdan ba halor eh ha ka Group C bad ban rung sha ka Knockout. Ka jingwanphai biang jong u Neymar ka long kaba kham kongsan shuh shuh hadien ka jingsngewkhia kaba dang shen na ka bynta ka jingmynsaw jong u Raphinha.
Katba u Ancelotti u la pynthikna ba u Neymar u long uba la biang bad uba la pynkhreh ban ïalehkai, um shym la pynpaw satia la une u khlur un sdang ïa ka jingïalehkai ne un wan na ka ben kum u nongbujli. Lada un mih madan mynta ka sngi, kan dei ka sien kaba nyngkong eh jong u Neymar ban ïalehkai na ka bynta ka Brazil naduh ba ka jingmynsaw kaba jur ha ka khohsiew (ACL) ka la pynlong ïa u ban duh ïalehkai ha u bnai Risaw 2023. “U don; u la pyntbit bha ha kane ka taiew. U long uba koit ba khiah bad uba la pynkhreh ban ïalehkai. Ngi sngewkmen shibun ba u la wanphai biang.” – ong u Carlo Ancelotti, u nonghikai ba ha khlieh duh jong ka Brazil (head coach).
