Shillong, Jylliew 24
Ka Shillong Lajong FC ka la pynbna bad u coach ba la slem jong kane ka klob, u Bah Bobby L Nongbet un shimti kum u khlieh duh jong ka Youth Development kane ka kynhun ïalehkai ka nongbah.
U Bah Nongbet u la long uwei na ki coach ka youth development bad u la long uba kongsan ban kyntiew ïa ki phutbol ha ka Jylla namar u dei ruh uba bat kum u District Sports Officer (DSO) Ri-Bhoi hapoh ka tnat ïalehkai bad uba la ju long teng kum u coach ka kynhun ïalehkai ka Jylla ha ki lympung ïalehkai shabar Jylla bad kumjuh ïa ka Shillong Lajong.
Ka jingthung ka long kaba kongsan namar ka la mih ruh ka jingkylli la ka Lajong ka lah ne em ban pynneh kum ka karkhana na ka bynta ki nongïalehkai jong ka. Hadien ba ka la wan ha ka kyrdan ba-ar ha ka Indian Football League 2025-26 hapoh ka jingïalam jong u Birendra Thapa, la khmih lynti ba katto katne ngut ki rangïalehkai kin shah die noh sha kiwei pat ki klob jong ka IFL lane Indian Super League. Te kumta ki rangïalehkai kiba la pynap lypa hapoh ka jingkhmih jong u Bah Bobby, kin kiew kyrdan noh sha ka kynhun ïalehkai (senior).
Kumba ka paw u Bah Nongbet u la don bynta hapoh ka shlem ai jinghikai jong ka SLFC naduh u snem 2005, hynrei hadien u la leit ïasoh ka Royal Wahingdoh FC, kaba la jah noh hashwa ba un wanphai biang sha katei ka klob.
Kumba ka paw u Bah Bobby u la ïoh ban ïalam ïa ka kynhun ha ki prokram ai jinghikai shabar ruh kynthup ïa ka Youth Coaching Diploma ha Budapest. U la pyndep kum u coach ba pura, ha kaba u la bat ïa ka kyrdan kum u AFC A Licence bad Goalkeeping Licence.
U la ïalam ïa ka kynhun ïalehkai ka SLFC ban khur jingjop ha ka Manchester United Premier Cup India, ha kaba ka la ïoh rung sha ka World Final ha England bad ban pynlong ïa ka Meghalaya kaba paw ha ka pyrthei.
Hapoh ka jingïalam u Bah Bobby, ka kynhun ïalehkai ka Jylla ka la ïoh ïa ka jingjop ha ka Sub-Junior bad Junior National Championship, ha kaba ka la wan ha ka kyrdan ba-ar bad balai.
Ki rangïalehkai kiba u Bah Nongbet u la lah ban sei ki long u Redeem Tlang, Samuel Shadap, Aiban Dohling, Naorem Mahesh Singh, Kynsailang Khongsit, Samuel L Kynshi bad u Phrangki Buam.
