Shillong, Jylliew 24
Ka Portugal ka la pyni ïa ka jingïalehkai kaba itynnad bha ha madan ïalehkai Houston ha Texas, da kaba pynliem ïa ka Uzbekistan da 5-0 kol ban ïoh ïa ka jingjop kaba khraw ha ka jingïalehkai jong ka Group K jong ka FIFA World Cup 2026 .
U Cristiano Ronaldo u la plie lynti ha kaba dang sdang kane ka jingïalehkai da kaba thep kol tang ha ka minit kaba 6, kaba pynskhem bad pynlamkhmat ïa ka kynhun. Tang khyndiat por ha ka minit kaba 17 la ïoh ban thep kol sa u Nuno Mendes na bynta ka Portugal. U Ronaldo sa shisien pat shuwa ka kylla miet ha ka minit kaba 39 u la ïoh ban thep ïa ka kol kaba ar ha ka ban pynlam khmat ïa ka kynhun da 3-0 kol.
Kala long shisha ka miet kaba eh na ka bynta ka Uzbekistan kaba la nang sniew shuh shuh haba u nongap kol u Abduvohid Nematov um shym la lah ban teh lakam ïa ka bol u la bakla ban thep sha la ka kol lajong. Ka kol kaba khatduh ha kane ka jigngïalehkai la ïoh ban thep da u ‘rang bujli ka Portugal u Rafael Leão ha ka minit ba 87.
Da kine ki kol, ha ka ne ka jingïalehkai u Cristiano Ronaldo u rangïalehkai ba 41 snem ka rta u la kylla long u rangïalehkai ba nyngkong eh ha ka histori ban thep kol ha ki hynriew tylli ki jingïalehkai FIFA World Cup bapher bapher jong ki shynrang, ha kaba u la pynïasoh ïa ka rekod ïalehkai ba slem jong ka histori bad u Lionel Messi.
Da kane ka jingjop kaba khraw, ka Portugal ka la pynskhem ïa ka kyrdan jong ka ha ka Group K ryngkat bad ka Colombia ha kaba kin ïakynduh ha ka jingïalehkai ka ban long ha ka 28 Jylliew 2026.
Ha kiwei pat ki jingïalehkai kane ka lympung la bteng ha kine kiwei harum ha kaba ka England bad ka Ghana ki la ïakhun kaba kut da ka jingïakhaid khlem lah thep kol ha ka jingïakhun kaba tyngeh bha ha ka Group L kaba la long ha madan Boston. Wat hapdeng ka jingïalehkai kaba bun ka jingbujli ha ka kylla miet kynthup ïa ka jingpynrung ïa u Bukayo Saka bad u Marcus Rashford na ka bynta ka England, ym don kawei ruh ka liang kaba lah ban thep kol. U Declan Rice u la ïoh ïa ka yellow card ha ka kylla step na ka bynta ka England.
Katba ka Croatia ka la pynïoh ïa ka jingjop kaba kongsan bha pyrshah ïa ka Panama da 1-0 kol ha ka jingïakhun ha ka Group L ha madan Toronto. Ka por kaba rai ka la wan ha kaba sdang jong ka kylla miet ha kaba u Ante Budimir uba la shah bujli ha ka kyllamiet u la thep ha ka minit kaba 54. Ka Panama ka la pyrshang ban ïakhun hynrei kam shym la lah ban pynpra ïa ka jingïada kaba khlaiñ bha jong ka Croatia.
Ha kawei pat ka jingïakhun jong ka Group K ka Colombia ka la pynliem ïa ka DR Congo da 1-0 kol Kaba la long ha madan Guadalajara. Hadien ka jingïakhun kaba jur bha ha ka kylla step kaba la don ar tylli ki jingbishar bapher-bapher jong ka VAR, u ‘rangïalehkai ba shadien u Daniel Muñoz u la kylla long u nong wanrah jingjop na ka bynta ka Colombia, da kaba thep ïa ka kol ha ka minit kaba 76.
