Shillong, Jylliew 28
Ka Meghalaya Cricket Association (MCA) ka la sospon ïa u Secretary jong ka, u Bah Rayonald Kharkamni bad ka la weng shirta jingim ïa u Coach bad Manager hadien ba ka Meghalaya State Commission for Women (MSCW) ka la lap ïa ki jingshisha baroh halor ka jingshah kynnoh don kti ha ki kam kren kynshleiñ ïa ka kynhun ki ‘thei ïalehkai Under-23.
Ïa kane la pynpaw da u President ka MCA u James Sangma ha ka sngi Saitjaiñ ha kaba u la ong ba u pdiang ïa ka kaiphod na ka Commission bad ka MCA ka la pyntreikam ïa ki da kaba sospon shirta jingim ïa u Coach (Hemant Roy) bad Manager (Sanjay Mondol) ha kaba kim lah shuh ban dangïadon bynta ha kino kino ki lympung ïalehkai la ka long hapoh ka Jylla ne wat shabar ruh kumjuh.
U James u la ïathuh ruh ba ka MCA ka la sospon ïa u Secretary ba mynta u Bah Rayonald Kharkamni namar um shym shym la shim khia ryngkat bad ki dkhot barim jong kane ka synjuk hadien ba ki ‘thei ïalehkai kriket ki la dep ban ujor sha ki ha u snem ba la lah. Ïa kane ka kam la phah sha u nongbishar jong ka MCA ban leh ïa kaba donkam.
U Sangma u la ong ba ka synjuk kan sa thaw mardor ïa ka Internal Com-plaints Committee hapoh ka POSH Act bad u la pynpaw ban pyntreikam ïa ka ‘zero-tolerance policy’ ban khanglad n aka jingshah jrong kti ne kren kynshleiñ ïa ki ‘thei ïalehkai.
U la ïathuh ba ïa ki jingujor la ai jingtip sha ki nongkitkam ba mynshuwa jong ka MCA ha u Nohprah jong u snem 2025 bad u la kynnoh ba ïa kane ka kam ym shym la lah ban wanrah hakhmat ka Council. Katkum ka jingpynpaw jong u, u Sangma u la tip ïa katei ka jingjia tat hadien ba ka la poi ha ka Women’s Commission.
Shuh shuh u Sangma u la pynshai ruh ba ka MCA kan ym tuklar eiei ïa ki jinglap jong ka Commis-sion bad kan ym shim khia kit ïa ki jinglut jingsep pyrshah ïa uno uno u nongkitkam uba thmu ban leit sha ka iingbishar.
