Shillong, Jylliew 28
U President ka Meghalaya Cricket Association (MCA) u James P.K Sangma bad uba long ruh u MP Rajya Sabha, u la pynpaw ba ka don ka kynrum kynram halor ka jingpynlut pynsep hapoh ka synjuk ïalehkai jong ka MCA.
Kine ki kynrum kynram ki la mih ha kaba ïadei bad ka ilekshon kaba la dep pynlong ha u Nohprah jong u snem ba la lah ha Aranya The Merian Resort (Ri Bhoi District) ha kaba ka jingpynlut ka la kot shaduh T. 16,29,596. Kane ka kynthup naduh kaba bat ïa ki kamra,ka bam ka dih na ka bynta baroh kiba wan sha katei ka jingthep vote.
“Phi lah ban mutdur ba ka sha shipela ka lah ban shongdor haduh T. 650 haduh T.700. Nga kum u President ngam sngewlah ban pdiang bad ngam kwah ban ïakyrsum lang ha kane ka jyrshih kaba ki dkhot barim ka MCA ki la leh. Ha ka jingshisha ki la dei ban rah ïa kane hakhmat ka Council ban ïakren para dkhot halor kane ka bynta bad kaei kaba yn leh.”
U la ong ba ka pisa kam dei kaba shu soh ha u dieng bad kaba lah ban kheit katba mon. “Ngi sngewdonbok ba ka jingkyrkhu ka wan lyngba ka BCCI, hynrei ym dei pat ban shu pynsyrwa kai ïa ka. Ngi hap ban da kheiñ thik pa thik ïa kaei kaba ngi pynlut.”
“Te kumta nga la ong ba ha kaba ïadei bad ki bill kiba dei ban siew, yn soi noh tang ma nga u President ryngkat u Treasurer lane u Secretary bad ngam kwah ban shu soi khlem da tip thikna ïa kaei kaba pynlut.
Ka MCA ka la pynsyrwa kai ïa ka pisa da kaba siew sha ka Lone Tree Consultants kaba long ka nongpyniaid ïa ki tiket na ka bynta ki kynhun ïalehkai kriket ha kaba ka la shim haduh arshah na kaba dei ban siew.
“Kum u President nga kwah ban wanrah ïa ka jingkhuid ha ka rukom treikam jong ka MCA. Ngi ïohi ba ka la don ka jingpynsyrwa kai ïa ka pisa da kaba siew arshah na kaba ngi dei ban siew,” la bynrap u James da kaba kam ba u don lut baroh ki sakhi satar ban pynshisha halor kane ka bynta.
