Shillong, Naitung 01
Ka Meghalaya State Commission for Women (MSCW) ka la aipor 30 sngi ïa ka synjuk ïalehkai jong ka Meghalaya Cricket Association hapoh ka jingïalam u James PK Sangma kum u President, ba kan leh eiei na ka bynta ban ai ki lad jingïada ïa ki ‘thei ïalehkai kriket ka Jylla.
Ïa kane la pynpaw da ka Chairman ka MSCW ka Kong Ïamonlang M. Syiem ha ka jingïalang bad ki nongthoh khubor ha ka sngi Balang, hadien ba la ïoh ïa ki sakhi satar kiba biang halor ka jingdon kti u Coach bad Assistant Manager ha ka kam jrong kti bad kren kynshleiñ ïa ki ‘thei ïalehkai kriket Under-23 ka Jylla ha u snem ba la lah.
Kine ki long ka jingpynshitom ïa u Coach bad u Assistant Manager, kumjuh ban pynbiang ki lad jingïada ïa ki ‘thei ïalehkai naduh ki kamra khreh kiba kyrpang, ka bam kaba biang, ka jingsiew na ka bynta jong ki khnang ba kan ym ktah ïa ka lawei ïalehkai ka jong ki bad kiwei ki jingdonkam khnang ba kan ym wan jia shuh kum kine ki jingjia hadien habud.
“Ka jingpynngat ruh ïa u Coach bad Assistant Manager hapoh ka POSH Act halor ka jingdon kti jong ki ha ki kam jrong kti bad kren kynshleiñ ïa ki ‘thei ïalehkai. “Ïa u Coach la ai hukum ba un shah sospon kumba katto katne bnai namar ki jingkren kynshleiñ jong u, hynrei ha kaba ïadei bad u Assistant Manager ka jingujor ka la long kham eh namar u la jrong kti ïa kawei na ki ‘thei ïalehkai, te kumta ka rai ka long ban weng shi syndon ïa u bad ba um lah shuh ban dangïadon bynta ha kino kino ki prokram ïalehkai kriket,” la ong ka Kong Syiem.
“Kine ki rai kiba ngi la shim ki long kat kum ka jingujor da ki hynriew ngut ki ‘thei ïalehkai pyrshah ïa u Coach bad u Assistant Manager.”
Sa kawei pat ka jingujor ka long pyrshah ïa ki saw ngut ki dkhot barim ka Meghalaya Cricket Association kynthup ïa u President bad Secretary (ba dangbat mynta) halor ka jingbym shim khia jong ki ban leh eiei ïa ki jingujor jong ka kynhun ki ‘thei ïalehkai kriket ba ki la phah naduh ka 2 bad 3 tarik u Nohprah jong u snem 2025.
“Ngi sngew lyngngoh ba balei ka shimpor haduh san bnai. Ha ka jingshisha kitei ki ‘thei ïalehkai ki la ujor sha ka MCA naduh ka 2 bad 3 tarik u Nohprah jong u snem 2025. Watla ki la aidaw ba ki kam kiba ïadei bad ka ïingbishar lem bad ka ilekshon, hynrei hadien shi taïew ne ar taïew ki la dei ban ïalum lang ban ïakren halor kane ka bynta,” la ong ka Kong Ïamonlang.
Shuh shuh kane ka kynhun jong ka MSCW ka la leit jurip ïa ka jinglong jingman kaba ïadei bad ka jaka khreh ki ‘thei ïalehkai bad kaei kaba ki shem kam long kaba ïahap. “Te kumta ngi la aipor ïa ka MCA ba kan pynbiang ïa baroh ki lad jingïada na ka bynta ki ‘thei ïalehkai, kynthup lang naduh ki kamra khreh kiba kyrpang, ka bam kaba biang, ka jingsiew na ka bynta jong ki bad kiwei kiwei.”
