Shillong, Naitung 01
Ka kynhun ïalehkai ka Jylla hapoh ka lama jong ka Meghalaya Jeet Kune Do Association (MJKA) ka la khur ïa ka nam lahduh ne ka ‘Overall Team Champion’ ha ka All National Jeet Kune Do Championship 2026, kaba la sdang naduh 26 haduh 28 tarik u Jylliew ha Bishnu Nirmala Trust Indoor Hall, Guwahati, Assam.
Kane ka nam jop ka la wan hadien ba ka Meghalaya ka la lah ban kamai 300 poiñ. Ïa ka kyrdan ba-ar la ïoh da ka Manipur ha kaba ka la kamai 250 poiñ, katba ka Assam ka la wan ha ka kyrdan balai da kaba kamai 150 poiñ.
Kane ka kynhun ïalehkai ka Jylla ka kynthup ïa 60 ngut ki nongïalehkai, ha kaba ki la lah ban pynpaw ïa ki sap ïalehkai ba kyrpang jong ki. Ïa kane ka kynhun la ïalam da u Bah D. Ranee bad Kong Bajoplin Kharmudai. Katba ki technical official kiba kynthup ïa u Bah Kitbok Dkhar bad Kong Hammylienki Dkhar, ki la ïadon bynta lang ban pynlong ïa kane ka lympung kaba jop.
Na ka liang ka MJKA ka la ai khublei ïa ki nongïalehkai kiba la lah ban khur takma lyngba ka jingïalehkai bha ka jong ki.
Ïa katei ka lympung la pynlong da ka United Jeet Kune Do Federation of India (UJKDFI).
