Jerusalem, Naitung:
Ka Israel ha ka Sngi Palei, ka la kynmaw ïa ka jingdap 1000 sngi ka jingleit thombor jong ka Hamas ïa ka Israel ha ka 7 tarik u Risaw jong u snem 2023, kaba la wanrah ïa ka thma kaba la neh 3 snem mynta.
Ia kitei ki jingïalang kynmaw burom la pynlong ha kylleng ka ri, kumjuh ruh ki jingïakhih pyrshah ïa ka jingpynïaid jong ka sorkar ïa ki jingjia ha ka por bad hadien ka jingshah thombor.
Kaba nyngkong ka la sdang ha ka por 6:29 baje mynstep thik, ha kaba ka seng Palestine Islamist movement ka la sdang ban hiar thma ïa ka Israel, kaba la wanrah ïa ka thma kaba jur hapoh ka nongbah Gaza.
Katei ka jinghiar thma ba la lam khmat da ka Hamas, ka la shim ïa ka jingim jong 1,221ngut ki briew ha Israel, katkum ka jingkheiñ ba la buh jingthoh da ki lad pathai khubor ka Israel, kaba la pynshong nongrim ha ki jingkheiñ ba tikna jong ka Israel. Ki lehnoh ki la rahbor ruh ïa 251 ngut ki briew na Israel ha katei ka por, kynthup ïa ki riew paidbah bad ki riew shangkai pyrthei kiba don ha Israel ha katei ka por ba ki lehnoh Hamas ki la leit ban hiar thma ïa ak Israel.
Ka jinghiar thma kylliang bad ka jingleit kput ki shipai Israel pat pyrshah ïa ki lehnoh Hamas hapoh Gaza, ka la shim ïa palat 73,000 ngut ki mynsiem briew, katkum ka kaiphod ba la ioh ban buh jingkheiñ da ka tnat ka koit- ka khiah jong ka nongbah Gaza, kaba treikam hapoh ka jingsynshar jong ka Hamas bad ïa ki jingkhein jong ka, la shim ba ki long kiba lah ban shaniah da ka United Nations.
Hadien ba ka jingsangeh thma ka la sdang treikam naduh ka 10 tarik u Risaw mynshem snem, ym duna ïa ka 1,053 ngut ki nong Palestine ki la shah pyniap ha Gaza, katkum ka khubor jong ka tnat ka koit ka khiah bad ki shipai Israel ki ong ba ki la duh noh ïa 5ngut ki shipai bad uwei u kontraktor ha kajuh ka por. Ki shipai Israel ki bat haduh 70% na ka jaka.
Ka Dorbar jong u bnai Risasw, kaba la seng da ki longiing jong ki nongshah pyniap bad ki nongshah rahbor kiba la shah kem ha ka 7 tarik u Risaw, ka dei kawei na ki nongpyniaid ba kongsan jong katei ka sngi.
Ki jingialang ki long ha khmat ka iing dorbar jong ka Israel bad hajan ki iing jong ki dkhot sorkar.
“Ki longïing jong ki nongshah rahbor bad ki longïing kiba la duh ki dawa ban thaw ïa ka komishon tohkit jong ka jylla mynta!” ka Dorbar jong u bnai Risaw ka la ong hapoh ka rynsan ‘X’.
Ka plaza “Hostages Square” ha Tel Aviv, kaba la kylla long ka jaka pdeng jong ka jingiakhun ban pyllait ïa ki nongshah kem ha ka por jong ka thma Gaza, la thmu ban pynkylla kyrteng noh ïa ka kum ka “Madan Jingkynmaw”.
La buh ruh ban pynlong ïa ka jingïalang kynmaw burom ha ka por 8:00 baje mynstep ha Yarkon Park jong ka Tel Aviv, ha kaba ki longïing jong kiba la shah pynïap bad ki riew pawkhmat jong ka jingïakhih pyrshah pyrshah ïa ki bor synshar Israel bad ka rukom pynïaid jong ki ïa ki jingjia.
U heh shipai jong ka Israel, u Lieutenant General Eyal Zamir, u la ong ha ka sngi Nyngkong ba “Kane ka sngi ka pynkynmaw ïa ngi ïa ka jingkitkhlieh jong ngi baroh kawei bad ïa ka jingkit kaba shong ha ki tyrpeng jong ngi”.
“Ngi kynmaw, ngi nang, bad ngi pynkhreh ïa ka jingbteng jong ka jingialeh bad ki jingeh kiba bun kiba dang sah ha khmat,” la ong jong u ha ka kyrwoh.
U Gadi Eizenkot, uba dei u heh shipai barim bad uba long mynta u kyrtong ba pawkhmat ban mih bujli ïa u Myntri Rangbahduh ka ri, u Benjamin Netanyahu, ha ka elekshon, kaban sa long ha u bnai Lber, ula kdew ïa katei ka sngi ha ka X post kaba lyngkot.
“1,000 sngi. Ngin dang pynshisha ïa lade ba ngi long kiba bitdor. Nga kular. Gadi,” u la thoh.
Katkum ki jingwad bniah, ki nong Israel kiba bun ha kylleng ki bynta jong ka saiñ pyrthei ki kyrshan ïa ka jingthaw ïa ka kynhun ban tip mano ba donkti halor ka jingbym lah jong ki bor synshar ban khanglad ïa ka jingshah thombor kaba shyrkhei tam ha Israel.
Hynrei ka sorkar jong u Netanyahu, ka la kyntait slem bha ban thaw ïa kum kane ka komishon, kaba kum kane ka komishon ka Israel ka ju thaw ha ki por ba la leit noh ban tohkit ïa ki jingbakla kiba khraw ha ka kyrdan jong ki jylla.
