Washington, Naitung:
Katkum ki khubor, la ong ba ka jingleit hiar thma jong ka Russia ïa ka Ukraine, ka la ktah ïa palat ar million ngut ki shipai, ha kaba ki shipai jong ka Russia, ki kit ïa ka jingkit kaba khia jong ka jingduhnong, la ong ka kaiphod ba la wad bniah bad ba la pynmih da ka kynhun pyrkhat jong ka US.
“Lada pyniasoh lang ïa ki jingiap jong ki nong Russia bad Ukraine, ki la palat ïa ka 2 million ngut”, la ong ka Centre for Strategic and International Studies (CSIS).
La antad ruh ba hapdeng 400,000 bad 450,000 ngut ki nong Russia ki la iap naduh ba sdang ka jingleit hiar thma jong ka Russia sha Ukraine ha u Rymphang jong u snem 2022 bad napdeng jong kitei ki 1.4 million ngut kiba iap, kiba mynsaw bad kiba jah hapdeng jong ka thma, kumba 4,00,000 ki dei ki nong Russia.
Ha kajuh ka por, ki shipai Ukraine, ki la mad hapdeng 525,000 bad 625,000 tylli ki jingshah pynjulor bad hapdeng 125,000 bad 150,000 ngut kiba iap hapdeng jong ka thma.
Hynrei la ong ba ka jingiap jong ki shipai Russia ha Ukraine ka long palat saw-shah ban ïa baroh ka jingiap jong ki shipai ka US ha baroh ki thma ba la pyniasoh lang naduh ka thma-bah ba ar,”. Watla katta, la ong ba ka jingbuh jingkheiñ jong ka Russia bad Ukraine halor ka jingdon kiba iap, ka lah ban nang kiew shuh-shuh.
