California, Naitung:
Ha kane ka jingjia, la ong ba kawei ka khynnah rit kaba dang 7 snem ka rta, ka la mynsaw jur haduh katta hadien ba katto- katne tylli ki ksew surok, ki la dait bad patar ïa ka bynta jong ka khlieh jongka katba ka dang lehkai shabar ka iing ha u bnai ba la dep.
Kane ka la jia ha ka por kumba 12:30 nohphai sngi jong ka 27 tarik u Jylliew ha ka thaiñ ba ka sah hapoh Corning, kumba 170 mile na ka phang Northwest jong ka nongbah San Francisco. Ia katei ka khynnah la ithuh kyrteng kum ka Patricia Edmiston bad ka la mynsaw jur ha ki bynta jong ka kjat bad la ong ba wat ka snieh khlieh jongka ruh ka la kad namar ka jingshah patar ha kitei ki ksew.
Ka kmie-ieid jongka, ka Monica Edmiston, ka la iathuh ba kitei ki ksew surok ki la dait bad patar ïa ka snieh khlieh jongka.
Hadien katei ka jingjia, ki la pynkit noh ïa ka Patricia sha kawei ka hospital kaba kham hajan bad hadien kata la pynkit ïa ka da ka liengsuiñ sha UC Davis Medical Center, kumba 100 mile na katei ka thaiñ, ha kaba, katei ka khyllung ka don hapdeng ka jingshitom kaba jur kumba katto- katne sngi hadien jong katei ka jingjia.
La antad ba ki don kumba 6 tylli ki ksew kiba ialang ban dait ïa katei ka khynnah ha katei ka jingjia bad ki bor pyniaid ka Tehama County ki la leit phah kem noh ïa kitei ki ksew kiba dang don mynta hapdeng ka jingpeit thuh la ki don jingktah ne khie biej khlem kano- kano ka daw kaba biang.
Ki bahaiing jong katei ka khynnah ki iathuh ba ka Patricia ka la ioh mih noh na jakasumar ha ka 30 tarik u Jylliew.
Hadien kata, la shna ïa ka website GoFundMe, ban lum jingïarap na kiba lah ban nohsynñiang naka bynta ka bai bam bad bai sumar jong katei ka khynnah, katba kitei ki bahaiing- bahasem jongka ki dang don hajan ka hospital ban ap miet bad ap sngi ïa ka mynba ka don hapdeng ka jingsumar.
