Washington, Naitung:
Kawei ka jhad paidbah kaba kit ïa kumba 2,000 tam ki jaitbynriew LGBTQ lane ki ‘long shynrang-kynthei, ka la shah khang noh ha ka por ba ka dang mut ban leit rung sha Turkey, ha kaba ki bor pyniaid katei ka ri, ki pynpaw ka jingbym sngewtynnad jongki ïa kitei ki jaitbynriew kiba dang bun ki ri ka pyrthei ki bym treh ban pdiang ïa katei ka kyrdan jaitbynriew.
La ong ba katei ka jhad ka mih na Athens ha ka 5 tarik u Naitung naka bynta ka 10 sngi ka jingleit jongka, ba la pynbeit da ka Atlantis Events, ka kompeni na US ban ialam shangkai ïa ki jaitbynriew LGBTQ+. Kumta, la ong ba ki thmu ban leit poi sha ka Kad ieng jhad jong ka Turkey ha ka 7 tarik u Naitung bad hadien kata kin sa leit sha Istanbul.
Hynrei ki bor pyniaid jong ka Turkey ki la pynsangeh noh ïa ka jingthmu ban pynieng ïa ka jhad ha katei ka Kad ieng jhad jongki, da kaba ong ba ïa ka jhad la ai wai “da ki kynhun kiba la tip na ka bynta ki jinglong ki bym ïahap bad ka jinglong khyllah kaba long pyrshah ïa ka imlang- sahlang jong ngi”.
“Kam don satia kano- kano ka lad ba ka kynhun kaba la kdew kan leit jngoh ïa ka jylla jong ngi na ka bynta ka jingjia kaba kum kane,” la bynrap shuh shuh ki bor synshar.
Katei ka jhad jngohkai pyrthei, kaba long trai da ka Virgin Voyages, kaba la kyrshan da u Richard Branson, mynshwa, ka la leit sha ki kad lieng jong ka Turkey, bunsien khlem kano- kano ka jingjia. Ka Atlantis Events, ka iathuh ba ka la poi ha Istanbul bad Ku?adas?, haduh 13 sien ha kine ki 25 snem ba ladep.
U Rich Campbell, president bad CEO jong ka Atlantis Events, u la iathuh ha ki lad pathai khubor jong ka US, ba u sngew kyndit ïa katei ka rai, ha kaba u la khot ïa katei ka rai, ba ka dei ka sien kaba nyngkong ha ka histori jong katei ka kompeni, kaba la 36 snem, ba la iathuh ba ngi lah ban nym shong lieng hangne, namar ba ngi long mano mano.”
Hadien ka jingpynsangeh, ki nongpynïaid ki la ong ba katei ka jhad mynta kan pynkylla ïa ka lynti ïaid, ha kaba la thmu ban sangeh ha Cairo, Egypt bad ka dewlynnong Greek ha Crete ha ka jaka jong ka Turkey.
Ka sorkar Turkey kam pat pynmih kano kano ka jingkren kaba shai halor katei ka rai.
Kane ka sienjam ka long hapdeng ka jingkynthoh kaba dang ïai bteng na ki kynhun ïada ïa ka hok longbriew manbriew halor ka jinglong jong ka Turkey halor ka hok jong ki LGBTQ+. Katba ka jingshongkha shongman kam dei kaba be-aiñ ha katei ka ri, hynrei ïa ki jingïaid paidbah jong ka Pride ha Istanbul la khang naduh u snem 2015, ha kaba ki bor synshar ki la kdew ïa ka jingeh ha ka liang ka jingïada. U President Recep Tayyip Erdogan bad ki dkhot jong ka seng synshar jong u ki ju shah kynthoh namar ba ki pyndonkam ïa ki kyntien kiba tyngeh pyrshah ïa ki jaitbynriew LGBTQ+.
