Tehran, Naitung:
Ka Iran ha ka Sngi pyndonburom ïa ka jingïap u heh jongka- u Ayatollah Seyyed Ali Khamenei, ka la pynpaw ka jingïaroh bad jingsngewnguh ïa ka Indïa halor ka jingdon ryngkat jong ka Indïa ha katei ka sngi leh burom jong katei ka ri ïa utei u heh nongïalam jongka.
Ka tnat Embassy jong ka Islamic Republic sha Indïa, ka la pynpaw ïa katei ka jingai khublei ka Iran kum kawei na ki dak ba khraw jong ka jingïadei jingmut hapdeng ka Iran bad Indïa ha kane ka kynti bad la khmih lynti ruh ba ka Iran kan lah ban ïatreilang bad ka Indïa ha kiba bun ki lïang khamtam eh ha ka khaïi- pateng.
Ha ka Sngi Thohdieng, ka kynhun ba heh jong ka Ri Indïa kaba kynthup ïa u Lat ka jylla Bihar u Lieutenant General (Retired) Syed Ata Hasnain bad ka myntri kam bar ri ka Pabitra Margherita ki la leit ai burom ïa u nongïalam ba ha khlieh duh jong ka Iran, uba la shah pynïap ha ka jinghïar thma jong ka US bad ka Israel ha u bnai Rymphang.
Lah ban kdew ba kyrpang, u nongïalam ka Congress u Salman Khurshid, myntri rangbah barim ka Jammu and Kashmir bad ka Mehbooba Mufti, myntri rangbah barim ka People’s Democratic Party, ha ryngkat ki nongïalam nïam Sikh, Hindu, Muslim, bad Khristan na Indïa, ki la ai burom ruh ïa utei u nongïalam ka Iran ba la khlad noh.
Ha ka jingthoh kaba jrong ha ka rynsan ‘X’, ka Embassy jong ka Iran ka la ai khublei ïa ka jaitbynriew Indïa na ka bynta ka jingïashim bynta bad ka la ong ba ka ri Islam kan ym klet satïa ïa kane ka “jingkdew jong ka jingïalong paralok, ka jingsngewrit, bad ka jingburom kaba naduh ka dohnud.”
Ka la kdew ba ka “jingdon burom” jong ki nongïalam sain pyrthei, ki dkhot jong ka iing dorbar thawain, ki riewstad ba pawnam, ki riewstad, bad ki nongïalam jong ki jingngeit bad ki jaitbynriew nïam bapher bapher jong ka ri Indïa ha kine ki jinglehnïam ba kyrpang ka pynpaw ïa ka “jingïadei kaba jylliew ha ka histori, ka kolshor bad ka jinglong briew hapdeng ki ar tylli ki jaitbynriew jong ngi.”
“Ka la ieng ruh kum ka jingpynpaw kaba khlain jong ka jingburom markyllïang bad ka jingïatylli kaba shisha bad ki briew jong ka Iran ha kane ka por jong ka jingsngewsih jong ka jaitbynriew. Ki briew jong ka Iran kin ym klet satïa ïa kane ka jingleh jong ka jingïadei paralok, ka jingsngewrit, bad ka jingburom kaba naduh ka dohnud. Ki khein ïa ka kum ka jingpynshisha kaba kordor ïa ka jingïadei kaba neh hapdeng ka Ri Islam bad ka Ri Indïa kaba kham kordor. pynskhem ïa ka jingïadei paralok kaba la slem bha hapdeng ki ar tylli ki ri jong ngi,” la ong ka post.
“Ka Embassy jong ka Islamic Republic of Iran ha Indïa sa shisien ka pynpaw ïa ka jingsngewnguh kaba khraw ïa baroh ki heh sorkar Indïa, ki riew pawkhmat, bad ki riew donburom jong ka ri Indïa kiba la ïeng ryngkat bad ki paidbah ka Iran bad kiba la pynpaw ïa ka jingsngewlem ha kane ka por jong ka jingsngewsih,” la bynrap shuh shuh.
