Shillong, Naitung 07
Ka jingtuklar u President ka USA, u Donald Trump ban ailad ïa u rangïalehkai shakhmat u Folarin Balogun, uba la ïoh ban mih madan naduh kaba sdang, kam shym la urlong ha kaba kane ka kynhun ka la shah pynliem noh da 4-1 kol ha ka Belgium ha ka pre-quarter final jong ka FIFA World Cup 2026
Ka rai jong ka FIFA ban weng noh ïa ka rai sospon na ka bynta kawei ka jingïalehkai ïa u Balogun hadien ba u la ïoh ïa ka red card ha ka jingïakhun kaba la lah, ka la long ka jingïakren bad ka jingïatai nia da kiba bun ha kylleng ka pyrthei.
Kane ka jingpynkylla jong ka FIFA ïa kaei ba la rai ka la jia hadien ba u Trump u la kyntu ïa u President jong ka FIFA, u Gianni Infantino, ban bishar bniah ïa katei ka rai. Hadien ka la kut ka jingïalehkai, u rangïalehkai jong ka Belgium, u Romelu Lukaku, la i kumba u la rkhie beiñ ïa u Donald Trump da kaba pyni ïa ka jingshad ka jong u.
Wat ka FIFA ka la weng noh ïa ka rai sospon pyrshah ïa u Balogun, da kaba ailad ïa u ban ïalehkai pyrshah ïa ka Belgium, hynrei ka la long pynban ka jingjah burom ïa kane ka kynhun. U Balogun u la ïai long uba khlem lah ban thep kol ha kane ka jingïakhun pyrshah ïa ka Belgium. Shisien ba la pynthikna ïa ka jingduh noh ka USA na kane ka lympung ïalehkai, ki nongkyrshan ki la pynshlei ha ki rynsan social media da ki dur khih (meme) jong u Trump. Hynrei kaba kham paw ka long ka jingshad jong u Lukaku.
U rangïalehkai shapdeng ka Belgium u Yuri Tielemans u la ong hadien ba la kut ka jingïalehkai ba ka kynhun ka la lah ban ïalehkai bha ka dei na ka daw ki kynrum kynram kaba la mih pyrshah ïa u Folarin Balogun wat hadien ba u la ïoh da ka red card.
“To ngin ïakren beit, ngi la pynlong ïa ka jingïalang haba ngi la ïohsngew ïa ka khubor,” la ong u Tielemans shaphang ki kynrum kynram kiba la mih pyrshah ïa u Balogun. “Ngi la ong ha lade ba ngi donkam ban ïakhun tyngeh ha madan. Kata ka dei kaba ngi la lah ban leh mynta ka sngi bad nga sngew sarong shibun ïa ka kynhun.”
