Shillong, Naitung 08
Ki nongïalehkai jong ka Egypt ki la pynpaw ka jingsngew bynñiaw bad sngew ba ki la shah pynrem jubor ha ki katto katne ki rai jong ki nongpynïaid (rephri) kiba la pyni ïa ka jingïashah liang sha ka Argentina, watla ki la dei hok ban khur jop ha Atlanta ha ka sngi Ba-ar.
Watla ka la tam da 2-0 kol bad tangsah sa tang 20 minit ban poi sha kaba kut, ka Argentina, kaba la ïoh mynsiem na ka jingïalam jong u Lionel Messi bad ka kol kaba kongsan, ka la wanphai biang da kaba phylla bad ka la thep lai kol hapoh 14 minit ban pynliem noh ïa ka Egypt na ka World Cup.
U rangïalehkai ka Egypt u Mostafa Ziko, uba la thep ïa ka kol kaba ar ha ka minit kaba 67, u la pynrem jur ïa u rephri namar la kynnoh ba u la leh shiliang khmat na ka bynta ban ailad ïa katei ka lahduh, ha kaba u la ong, ‘Kane ka jingïalehkai ka dei kaba shukor.’
Ha kane ka jingïakhun ka Egypt ka la thep kol nyngkong ha ka kylla step lyngba u Yasser Ibrahim uba la thep da ka khlieh, ha kaba ka Argentina kam shym la lah ban pynphai. Ha kaba sdang jong ka kylla miet, u Mohamed Salah u la ïarap pynbuh bol na ka bynta u Ziko, uba la ïoh ban thep kol, ha kaba ka Egypt ka la tam da 2-0 kol. Watla ki nongïalehkai bad ki nongkyrshan ki la lehkmen, hynrei kynsan ka la long ka jingbynñiaw ha kane ka jingïalehkai, namar hadien ka jingbishar bniah jong ka VAR la khanglad ïa ka kol namar ka jingbakla kaba la jia haduh 100 yard na ka jaka thep kol.
Na ka liang u rephri u la mareh ban peit bniah lyngba ka ‘replay’ bad hadien u la pynsangeh noh ïa ka kol kaba ar jong ka Egypt bad lehse kan dei ka sien kaba nyngkong eh ïa ka ban rung sha ka quarter final ha ka World Cup. Watla katei ka kynhun kaba na Africa ka la thep kol dangkloi bad shah kyntait ka kol jong u Ziko, hynrei kam shym la lah ban khanglad ïa ka Argentina ban wanphai da ka jingjop.
U Ziko u la pynpaw ka jingsngew bynñiaw halor ka rai jong u rephri, bad ka la nangpynjur shuh shuh sa da kawei pat ka rai pyrshah ïa u rangïalehkai ka Egypt shwa ban kut ka por ïalehkai, hashwa ba ka Argentina kan jop da 3-2 kol. “Ka jingkhublei ka leit sha ka Argentina ha ka World Cup, hynrei ka jingïalehkai la shah shukor namar kim kwah ïa kiwei pat ba kin jop. Ka jingleh u rephri ka long ka bym lah ban pdiang.”
