Damascus, Naitung:
Ka tnat pahara jong ka France ka la ïathuh ba ka la don kawei ka jingbthei hajan ka hotel ba sah u Emmanuel Macron hapoh Syrïa ha ka Sngi Ba-ar, hynrei u President jong ka France um shym la iohsngew satïa ïa ki jingbthei.
Kine ki jingbthei bom ki pynpaw ïa ki jingeh ba khraw ha ka lïang ka jingïada ha Syrïa, ha kaba u Macron u dei u khlieh duh ba nyngkong jong kawei ka ri jong ka European Union ban leit jngoh naduh ba ki lehnoh ba la ïalam da u Sharaa ki la pynkhyllem ïa u Bashar al-Assad ha u snem 2024.
Uwei u nongthoh khubor u la ïathuh ba u iohsngew ïa ki jingbthei ha katei ka jaka bad u la iohi ïa ka tdem kaba kiew shalor suiñ na katei ka jaka. La khang ïa ki surok bad la pyntreikam ïa ki lad jingïada, la ong ka tyllong khubor jong ka tnat pahara.
La ong ruh ba ki jingbthei kim shym la ïohsngew na ka jingïaid kali jong u President bad uwei u nongthoh khubor jong ka Reuters ryngkat bad ka kynhun nongthoh khubor ba la synran lang ïa u Macron um shym la ïohsngew ïa ka jingbthei ne ïohi ïa kano kano ka jingkhihwin ha ka por mynstep jong u president jong ka ri France.
Hadien kane ka telebishon jong ka sorkar jylla ka la ïathuh ba u Macron bad u Sharaa ki la ïa kynduh ha ïing jong u president jong ka Syrïa.
Ka jingwan jngoh jong u Macron ka la pynpaw ïa ka jingkylla ha ka saiñ hima sima jong ka Syrïa hapoh ka jingsynshar jong u Sharaa, u heh shipai barim jong ka al Qaeda uba la seng ïa ka jingïadei kaba jan bad ki bor jong ka thaiñ Sepngi bad Mihngi kiba la kyntait ïa u Assad, katba u dang wad ban tei pat ïa ka ri kaba la shah pynpra ha ki 13 snem jong ka thma.
Ha ka por jong ka jingïaleh ha Syrïa, ki kynhun lehnoh kiba bun ba kynthup ïa ka Islamic State ki la ioh jaka ha katei ka ri.
U Sharaa, uba dei u dkhot jong ka kynhun Sunni Muslim ba bun paid jong ka Syrïa, ula kular ban tei ïa ka rukom synshar thymmai kaba kynthup lang ïa baroh ha Syrïa, naduh ba la pynkut ïa ka jingsynshar nar palat san phew snem jong ka longïing Assad. Hynrei ka jingkular jong u ka la shah tynjuh ha ki jingshah thombor kiba la pynlong ïa ki bor kyrshan sorkar pyrshah ïa ki dkhot jong ki kynhun nïam bad ki kynhun
jaitbynriew rit paid, ha kaba bun spah ngut ki la shah pynïap ha u snem ba la dep.
