Shillong, Naitung 09
U rangïalehkai shaphrang ka Switzerland u Zeki Amdouni u la long ba la khreh ban ïakhun pyrshah ïa u Lionel Messi, hadien ba ka kynhun jong u, ka la jam sha ka quarter-final jong ka FIFA World Cup 2026 bad u la biria ha ka rynsan social media, ba u lah ban sangeh noh shi syndon na ka jingïalehkai phutbol hadien ba u la ïoh ïa ka lad ban ïakhun pyrshah ïa u kapten jong ka Argentina.
Ka Switzerland ka la ïoh rung sha ka quarter final hadien ba ka la lah ban pynliem noh ïa ka Colombia lyngba ka tie-breaker da 4-3 kol ha ka sngi Ba-ar ha Vancouver. Katei ka jingïalehkai ka la kut noh ha ka jingïakhaid hadien ba kim shym la lah ban thep kol watla la pynjlan ïa ka jingïakhun sha ka ‘extra time’ hashwa ba ka Switzerland kan lah ban pynliem ïa ka liang pyrshah.
Kham hadien ba la khur ïa ka jingjop, u Amdouni u la pynpaw ka jingkmen ban ïakynduh pyrshah ïa u Messi. “Ngan leit ban ïakhun pyrshah ïa u Messi. Hooid nga lah ban shongthait noh na ka jingïalehkai phutbol.”
Kumba ka paw ka Switzerland ka la lah ban jam sha ka quarter-final ha ka FIFA World Cup ha ka sien kaba saw naduh ba ka la ïoh rung ïalehkai 13 sien ha ki World Cup. Hadien ba ka la shah rem noh ha ka pre-quarter final ha ki saw snem jong kane ka lympung, kynthup ïa ki lai ki jingïakhun, hynrei mynta ka la lah ban jam sha ka quarter-final ha ka sien kaba nyngkong naduh ba ka la rung sha ka World Cup ha u snem 1954.
Kane ka jingjop ïa ka Colombia ka dei ruh ka sien ba nyngkong ba ka Switzerland kan jop bunsien ïa ki jingïalehkai ‘knockout’ ha ka FIFA World Cup.
Ka jingïakhun pre-quarter final ka long kaba khlem lah ban thep kol wat haduh ka ‘extra time’ hashwa ban shut ïa ka tie-breaker ban rah ïa ka jingjop.
Te kumta lyngba katei ka jingjop ka Switzerland kan ïakynduh pyrshah ïa ka lahduh jong ki saw snem mynshwa, ka Argentina ha ka quarter-final ka ban long ha ka step jong ka sngi U Blei ha Kansas City.
Katba ka Argentina ka la lah ban pynliem ïa ka Egypt da 3-2 kol. Ïa kine la thep da u Cristian Romero, Lionel Messi bad u Enzo Fernandez.
