Shillong, Naitung 23
Ka lympung ïalehkai Shillong Premier League 2026 kan sdang ha ka sngi Saitjaiñ ha kaba ka lahduh jong ka aïom ba la lah, ka Langsning FC kan ïakhun pyrshah ïa ka Sawmer ha ka por 4:45 janmiet ha SSA Stadium, Polo.
Watla la dei ban pyllait ïa ka por bad ka tarik na ka bynta ki hynñiew tylli ki jingïalehkai, na ka liang ki bor pynïaid ka Shillong Sports Association ki la khmih lynti ban pynbiang pura na ka bynta baroh ki jingïalehkai ynda la kut ka lympung ïalehkai jong ka Durand Cup 2026.
Kumba ka paw kane ka lympung ïalehkai SPL ka la sdang ban khring biang ïa ki paidbah riew ieit phutbol ka nongbah ba kin wan ban sakhi ïa ki jingïalehkai bad khamtam leilei lyngba ka jingïoh rung ka Nongkseh sha kane ka kyrdan kan nangpynlong ïa ki paidbah ban pyndap ïa katei ka stadium.
Baroh ki khmat ki phai sha ka Nongkseh, kaba la kiew kyrdan mynta u snem hadien ba ka la long ka lahduh ha ka First Division 2025 hadien ba ka la jop haduh khyndait sien. Kane ka klob ka la rah ruh ïa ka Champions Cup 2025 ba la pynlong ha ka sien kaba nyngkong da ka SSA hadien ba ka la jop ïa ka Shillong Lajong. Ka jingïaid lynti kane ka kynhun ha kaba ka khur jingjop ha ka jingïalehkai shabar jylla da kaba ka la rah ïa ka Sikkim Gold Cup bad mynta u snem ka la rah ïa ka nam lahduh ha la ïing ha ka Meghalaya State League.
Kaba phylla ka long ba ki la lah ban jop khlem da shah rem wat tang shisien ruh. Namar kata kan long kaba eh la kan lah ne em ba kan khur ïa ka nam lahduh mynta u snem ïa ka SPL.
Watla katta kiwei pat ki kynhun ha ka SPL ruh ki long kiba la khreh na ka bynta kane ka aïom. Ka Langsning ka la long kawei pat ka kynhun kaba kynsai lyngba ka jingbat ïa ka nam lahduh ha ka SPL 2025. Kane ka kynhun hapoh ka jingïalam u Bah Khlaiñ Pyrkhat Syiemlieh ka la lah ban ïalehkai bha ha ka MSL, ha kaba ka la jop ïa ka Shillong Lajong ha ka semi final lyngba ka tie-breaker hashwa ba kan shah rem noh da 2-1 kol ha ka Nongkseh.
Ka Lajong kaba la jop san sien bad ka Mawlai kaba la jop ar sien, ki la khmih lynti ban bat biang ïa ka nam lahduh haka SPL jong u snem ba la lah, hynrei kim shym la lah ban kynjoh sha ka thong, bad ka la plie lad lad ïa ka Langsning ban kan rah ïa ka trophy nam lahduh.
Kumba ka paw ka Lajong ka la bteng ban ïalehkai bha ha ka Champions Cup bad ha ka MSL, hynrei ka Mawlai kam shym la lah ban kyntiew ïalade. Watla hapdeng ka jingtlot ha ka jingdon ki rangïalehkai ha ki saw tylli ki klob, hynrei ka Mawlai ka dangïai long ka kynhun kaba lah ban buh jingeh ha kane ka aïom.
Kawei pat ka kynhun kaba yn hap ban ïaphai ka long ka Rangdajied United. Ka la rah shisien ïa ka nam lahduh ha ka SPL ha u snem 2013, hynrei ka la wan ba-ar haduh hynñiew sien. Watla kam shym la lah ban kynjoh sha ka thong ha ka MSL, hynrei ym lah ban kheiñ sting ïa kane ka kynhun namar ka don ïa ki rangïalehkai kiba khynnah bad kiba kynsai.
Ha kawei pat ka liang kawei pat ka kynhun ka dei ka Meghalaya Police kaba la wanphai biang sha ka SPL hadien ba ka la wan ba-ar ha ka First Division jong u snem ba la lah. Kane ka kynhun ka la kynthup lang ïa ki rangïalehkai kiba thymmai, hynrei ym pat lah ban tip thikna la ka lah ne em ban pyni ïa ka mynsiem ïalehkai ha kane ka lympung.
Kiwei pat ki klob kiba ym lah ban kheiñ sting mynta ka aïom ki long ka Nangkiew Irat, Sawmer, Laitkor bad ka Mylliem.
