Shillong, Naitung 23
Ka India ka la thikna ban khur takma ha ka Commonwealth Games 2026, watla kane ka lympung ïalehkai ka dangshu sdang.
Ïa kane ka CWG 2026 la sdang ha ka sngi Palei ha Glasgow, Scotland ha kaba ka prokram jingplie ka la long ha ka por shiteng miet, hynrei ka India ka la ïohpdiang lyngba ka khlur ïakura kaba la khur takma rong ha ka Olympic, ka Lovlina Borgohain.
Kane ka khlur ïakura kaba na Assam ka la jop da ka ‘bye’ ha ka quarterfinal jong ka kyrdan ïakura kaba 75kg jong ki kynthei, te kumta ka la jam sha ka semi final. Kumba ka ju long kiba la rung sha ka semi final ki la thikna lypa ban khur la kumno kumno ïa ka takma rnong.
Kane ka kyrdan ïakura 75kg jong ki kynthei ka don tang san ngut ki ‘thei ïakura, ha kaba lai ngut ki la ïoh da ka ‘bye’ na ka bynta ban jam sha ka semi final. Nalor ka Lovlina, ka ‘thei ïakura na Australia ka Emma-Sue Greentree bad ka Tarona Khanum Badi Pasoni Taafaki na Tuvalu ki la jop da ka ‘bye’.
Ka ‘thei ïakura na England ka Mary-Kate Smith bad ka Patricia Mbata na Nigeria kin ïakhun pyrshah ha ka quarter final.
Te kumta ka Lovlina kan ïakynduh pyrshah ïa ka Taafaki kaba dang 20 snem ka rta, ha ka 31 tarik mynta u bnai. Kane ka long ka kynthei kaba nyngkong eh napdeng kiba dangkhynnah na Tuvalu ban ïakhun ha katei ka lympung ïalehkai kaba heh. U hynmen jong ka, u Pasoni Taafaki un ïashim bynta ha ka kyrdan ïakhun jong ki shynrang ha ka kyrdan ïalehkai kaba 70kg.
Ha kawei pat ka liang ka Lovlina ka la khmih lynti ban ïalehkai bha ha kane ka lympung naduh ba kam shym la lah ban pynurlong ha ka Birmingham Commonwealth Games ha u snem 2022 ha kaba ka la shah rem noh ha ka quarter final. Kane ka jingshah rem ka long da 2-3 ha ka Rosie Eccles jong ka Wales ha ka kyrdan ïakura kaba 70kg.
Ha kane ka lympung ka India ka la khmih lynti ban khur takma namar ka sei haduh 125 ngut ki nongïalehkai ha ki 13 tylli ki jingïalehkai bapher bapher, kynthup ïa ka para-sports.
