Saudi, Nailar:
Katkum ki khubor, la iathuh ba ki bor pyniaid ka Saudi ki la pynsangeh treikam noh ïa kawei ka Kad Liengsuiñ ha ka Sngi Ba-ar, hadien ba ki lehnoh Houthi, kiba ju ioh jingkyrshan na ka Iran, ki la pynbna ba ka la leit thombor sha katei ka bynta jong ka Saudi Arabia ha katei ka step.
Ha u bnai ba ladep, ki Houthi ki la pynbna ïa ka jinghiar thma na duriaw ïa ka Saudi Arabia, kaba dei ka ri kaba heh tam ha ka pyrthei ban shalan umphniang bad naduh katei ka por, ki la kam ba ki la shah thombor bunsien ha ki jhad kit umphniang bad ïa ki jingtei.
Kumjuh ruh ka Saudi Arabia, la ong ba ka la siew kylliang halor kane da kaba thombor ïa ki jaka treikam ba kongsan jong ki lehnoh Houthi.
U nongaiktien jong ki shipai Houthi, u Yahya Saree, u la ong ba ki lehnoh “ki la jop ban siat ïa ka thong kaba rit paid kaba dei jong u nongshun Saudi ha kad liengsuiñ Najran da kaba pyndonkam da ka drone”.
U la bynrap ruh ba ka jinghiar thma ha ka kad liengsuiñ ba shatei lam mihngi ka long “kum ka jingkynthoh halor ka jingpynkheiñ jong ki nongshun Saudi ïa ka suiñbneng halor ki jylla Saada bad Hajjah da kaba pyndonkam ïa ki drone”.
Ka tyllong khubor na ka thain ka la iathuh ha ki nongthoh khubor ba ka radar ba kongsan jong ka kad liengsuin ka la shah ktah, kaba la ktah ïa ka jingtreikam.
Ka website jong ka kad liengsuiñ ka la thoh kum “bym tip” ïa ka jinglong jong ki liengsuiñ kiba la buh por na ka bynta ki khyndiat sngi ban wan.
Ka Saudi Arabia, haduh mynta, kam shym la ai kano kano ka jingkynthoh halor katei ka jingshah thombor kaba la kynnoh.
Kane ka kad liengsuiñ kaba rit ka don hajan u pud u sam jong ka Yemen bad ka don tang kawei ka jaka liengsuiñ kaba pynïaid ïa ki katto katne ki liengsuiñ ha ka shisngi.
Ka jingialeh ka la khie ha u bnai ba la dep, kaba dei ka sien kaba nyngkong ba ka Saudi Arabia bad ki Houthi ki la ïa khaii da ki suloi kiba jur naduh ka jingiateh kular ha u snem 2022.
Ka kynhun shipai ba la ïalam da ka Saudi Arabia, ka la don ha ka thma bad ki Houthi, naduh u snem 2015, hadien ba ki lehnoh, ki la kurup ïa ka nongbah Sanaa bad pynher jubor ïa ka sorkar, kaba la ithuh da ka pyrthei.
Ka jingialeh pyrshah kaba la wan biang hapdeng ka Saudi Arabia bad ki Houthi ka long kum ka nuksa kumno ka thma hapdeng ka US bad ka Iran ka la nang jyllei.
