Washington, Nailar:
Ka sorkar jong u Trump ha America, ka la thmu ban pynkiew dor shuh-shuh ïa ka ïa ka H-1B Visa bad L-1 Visa, ka sienjam kaba lah ban nang kyntiew ïa ka jinglut na ka bynta ki kompeni heh jong ka US, kiba shaniah ha ki nongtrei kiba tbit nabar ri, kynthup ïa ki hajar ngut ki riew shemphang na India. Ka kyndon kaba khatduh la khmih lynti ha u Naitung ban pyniar ïa ka “9-11 Response and Biometric Entry-Exit Fee’ sha ki dorkhas kiba pan jingpynjlan ïa ka visa trei, katkum ka agenda jong ka tnat pahara ri.”
Hapoh ka kyndon kaba mynta ha US, ki nongpyntreikam kiba don palat 50 ngut ki nongtrei, palat shiteng na ki ki don ïa ka visa H-1B ne L-1, ki donkam ban siew pisa shuh shuh $4,000 na ka bynta ki jingujor H-1B bad $4,500 na ka bynta ki jingujor L-1 tang haba ki thep ïa ka jingujor ba nyngkong lane haba u nongtrei u kylla.
“Ka DHS ka dang pynkylla bad pynshai ïa ki kyndon ban batai bniah ba ki ‘Response Fees’ 9-11 kin treikam ha baroh ki jingpynjlan ïa ka ‘Petition’ jong ka H-1B bad L-1,” la ong ka kyndon.
Kane ka jingtyrwa kaba thymmai ka dei hadien ka jingshah pynphai kylla ha ka liang ka aiñ kaba dang shen ïa ka sorkar Trump hadien ba ka ïingbishar ba ha khlieh duh jong ka US ka la kyntait ban pynsangeh noh ïa ka rai jong ka ïingbishar kaba kham poh kaba la weng noh ïa ka jingtyrwa jong ka ban siew ïa ka bai lutksan kaba long US$100,000 na ka bynta ki visa thymmai H-1B.
Namar ba ki nongtrei kiba don ïa ki visa H-1B ki ju donkam ban pynjlan ïa ka visa hadien ba ki la sah lai snem nyngkong, ki jingkylla ba la tyrwa ki lah ban pynkiew ïa ka jinglut kaba ïadei bad ka jingwan buhai shnong na ka bynta ki kompeni kiba shaniah shibun ha ki riew shemphang nabar ri, kynthup ïa ki riew shemphang na India.
