Mecca, Nailar:
Ka ri Pakistan, Saudi Arabia bad Turkey ki la soi ïa ka jingïateh kum ka jingïada ba kongsan ba la khot ka “Mecca Joint Defence Agreement” ha ka sngi Thohdieng hapdeng ka jingthnam ka jingshah hiar thma ha Middle East. Kane ka jingïatehkular yn pynshngain bad pynkhlain shuh shuh ïa ka jingsnohkti hapdeng kine ki lai tylli ki ri ha ka por ba ka jingsyier shaphang ka jingbym shngain ka nang kiew.
Katkum kane ka jingïatehkular, ka jinghiarthma ïa iewei na kine ki lai ri kan long bad pdiang kum ka jinghiarthma ïa baroh lai.
“Kane ka Jingïatehkular ka thmu ban pynkhlain ïa ka jingïada lang ban ïada na kano kano ka jingshah hiar thma, bad ka pynskhem ba kano kano ka jinghiar thma da ki tiar thma pyrshah ïa iewei na kine ki Lai Ri kan long ka jinghiar thma ïa baroh. Ka ai ruh ïa ka jingpynkhlain ha baroh ki phang jong ka jingïatreilang ha ka liang ka jingïada hapdeng kine ki lai ri”, la pynpaw ka Foreign Ministry jong ka ri Pakistan ha ka kyntien ba pynmih da ka jingpynshai.
Ïa kane ka jingïatehkular la soi ha ka jingïakynduh hapdeng u Saudi Crown Prince Mohammed bin Salman, u Turkish President Recep Tayyip Erdogan bad u Prime Minister jong ka Pakistan u Shehbaz Sharif ha Saudi Arabia.
Ha ka sngi Palei, u Sharif u la poi na ka bynta ka jingïakynduh ba lai sngi ryngkat bad ki kynhun bakhraw kiba kynthup bad u Army Chief Field Marshal Asim Munir.
Kane ka jingïateh ka wanrah lang ïa ka Saudi Arabia kaba riewspah ha ka umphniang bad ka Pakistan kaba pyndonkam da ki nuclear bad kumjuh ruh ïa ka Turkey, kaba don ïa ka kynhun shipai kaba ar ha ka NATO bad ka kam ïada ri kaba kiew stet bha.
