New Delhi, Nailar:
Ka ïingbishar jong ka India, ka la rai pynrem ïa u editor barim jong ka magazine Tehelka, u Tarun Tejpal, da kaba set phatok 10 snem, halor ka jingshah leh beijot jong u paralok barim jong u, ha kaba la pyndam noh ïa ka jingpyllait jong u ha u snem 2021, ha ka mukotduma, kaba la rim shisnem.
Ka Bombay High Court ka la rai pynrem ïa u Tejpal katkum ki kyndon jong ka ain jong ka ri India kiba ïadei bad ka jingshah leh beijot bad ka jingshah lehbein ha ka liang ka jingshongkha khleh.
Nalor ki jingshah set phatok kiba ïaid lang, ka ïingbishar ka la hukum ruh ïa u ban siew ïa ka kuna kaba la pyndap haduh palat 1mn tyngka ($10,500; £7,800).
U Tejpal, uba la kyntait ïa kitei ki jingkynnoh, u la ong shwa ban rai pynrem ba un sa ujor sha ka Supreme Court.
Ki jingkynnoh pyrshah ïa u Tejpal, uwei na ki editor ba pawnam jong ka India, ki la paw ha ki khubor ha ka ri baroh kawei ha u snem 2013. Shisnem shwa kata, da ki hajar ngut ki nong India, ki la ïashim bynta ha ki jingïakhih hadien ka jingshah leh beijot bad pynïap beiñ ïa kawei ka kynthei ha Delhi, kaba la pynlong ïa ka jingïakren kaba kham heh halor ka jingshah lehbeiñ ha ka liang ka jingshongkha khleh.
U nongmudui jong ka Tejpal, uba ym lah ban ithuh katkum ka ain jong ka India, u iathuh ba u la leh beijot ia ka, ha kawei ka lift, ha ka por ba ka Tehelka, ka don ha ka jing ïalang ba pawnam jong ka pyrthei, ha Goa, ha u bnai Nohprah jong u snem 2013, ha katei ka jing ïalang, kaba la wan ban ïashim bynta, nalor kiwei pat, u khlur jong ka Hollywood, u Robert De Niro. U nongbishar u buh jingkylli ïa ka jinglong kaba ‘dei’ na ka bynta ki nongshah lehbeiñ.
U Tarun Tejpal uba dei u nongthoh khubor uba donbor bad uba nyngkong eh, ha kaba sdang u la kynnoh ia katei ka jingshah thombor halor “ka jingbym lah ban bishar bniah” bad “ka jingpule bakla ia ka jinglong jingman” kaba la “lalam sha ka jingjia kaba sngewsih kaba ialeh pyrshah ia baroh kaba ngi ngeit bad ialeh na ka bynta jong ka”.
Hynrei katba ka mukotduma ka nang jur, u la pynmih ïa ka jingpynbna kaba kyntu ïa ki bor synshar ban bishar bniah ïa ki dur CCTV “kumta ka jingthoh kaba thikna jong ki jingjia ka paw shai”. U la kynnoh ruh ba katei ka mukotduma pyrshah ia u, ka dei shi bynta jong ka “political vendetta” jong ka sorkar Bharatiya Janata Party (BJP) ha Goa.
Ka Tehelka, ka kot khubor ba u Tejpal u la seng lang ha u snem 2000, ka la pynmih bun tylli ki scoop, kiba bun na ki, ki dei kiba la pynshong nongrim ha ki kam sting.
Katto katne na kine ki khana – kynthup ia ka Operation West End ha kaba katto katne na ki nongthoh khubor jong ka ki la pynlong kum ki nongdie tiar, ki ring dur rieh ia ki heh shipai, ki heh sorkar bad wat ia u president jong ka BJP kaba synshar ha kata ka por ba u shim pisa ban pynkhih ia ka jingiateh thok – ka la pynmih ia ki jingkhihwin ha ka ri bad ha ka pyrthei.
U Tejpal, u la shah kem ha u snem 2013 bad u la sah hynriew bnai hapoh phatok, haduh ba ka Supreme Court, ka la ai jamin ia u.
Ha u snem 2021, ka ïingbishar session ha Goa ka la weng noh ïa baroh ki jingkynnoh pyrshah ïa u. Hynrei ka jingpeit bniah jong ka nongbishar ha ka hukum kaba 527 sla ka la pynmih ia ka jingkynthoh hadien ba ka la buh jingkylli ia ka jinglong jong utei uba lait im..
Ha ki dur ba la shim tang hadien ka jingshah thombor, u nongbishar u la thoh, ba katei ka samla ka la “phuh samrkhie bad ka la paw ba ka sngewbha, ka long kaba thikna, ha ka jinglong kaba bha”.
“Kam shym la paw ba ka la shah pynthut, ka la buhrieh, ka la tieng ne ka la shah pynmynsaw ha kano kano ka rukom watla kane ka dei mardor hadien ba ka la kam ba ka la shah lehbeiñ ha ka liang ka jingïadei para kynthei,” ong ka hukum.
Ka sorkar Goa ka la ujor pyrshah ia katei ka jingpynlait ha ka iingbishar ba ha khlieh duh.
Haba mih khmat na ka bynta ka sorkar Goa, u Solicitor General Tushar Mehta u la kyntu ia ka iing bishar ba ha khlieh duh ba kan pynshitom ia u Tejpal da ka jingpynshitom kaba heh tam.
“Kaei kaba nga lah ban ong ka long ba nga la dap 62 snem ka rta. Nga ngeit ba nga dei u nongshah lehbeiñ ha ka sain pyrthei. Nga dei u kpa jong ki arngut ki khun kynthei. Nga don ka tnga. Kaba ngi lah ban ong ka long ba ngin leit shaneng bad ujor. U nongïasaid aiñ jong nga u kwah ba ngan kyrpad ïa phi ban long kiba jemnud,” la shim ïa ka ktien jong u Tejpal ha ka ïingbishar shwa ban pynngat ïa ka jingpynshitom.
La lap ba u Tejpal u donkti katkum ki kyndon aiñ kynthup ïa ka 376(2)(f), kaba ïadei bad ka jingshah lehbeiñ ba la leh da “u bahaïing hasem, u nongsumar ne u nonghikai jong u, ne u briew uba don ha ka kyrdan jong ka jingshaniah ne bor halor ka kynthei”.
