Kyiv Nailar:
Ym duna ia ka lai ngut, kynthup ia uwei u khynnah, ki la iap ha ki jing thombor jong ka Russia, ha ka miet hajan ka nongbah jong ka Ukraine, Kyiv, ong u heh sorkar katei ka thain.
Ha ki por mynstep jong ka sngi Saitjaiñ ki namding ki la bthei shaphang mihngi jong ka nongbah bad ki nongsakhi ki la ïathuh ba ki la ïohsngew ïa ki jingbthei kiba khlaiñ tang katto katne sngi hadien ba ki jingbthei ha kylleng ka Ukraine ki la pynïap ïa 21 ngut ki briew.
Ki jingbthei ballistic missile, ki la pyniap ia lai ngut bad mynsaw sa lai ngut, ong u heh jong ka tnad synshar shipai jong ka thain, u Timur Tkachenko, da kaba bynrap, ba ki thliew kiba la hap, ki la pynjulor ia ki iing sah bad ki kali, katba ka ding, ka la bthei ha kawei ka iing kaba kyrpang.
Ki nongtrei ba kyrkieh ki dang iakhun ruh ia ka ding ha kawei ka iing bad ka tank umphniang ha Kyiv, la thoh u Mayor Vitaly Klitchko ha ka Telegram.
Ka tnad treikam ba kyrkieh jong ka Ukraine, ka DSNS, ka la sam ïa ki dur kiba pyni ïa ki jaka buh kali, ka kam bad ka ïing kaba la shah thang ha Kyiv, da kaba bynrap, “La pynshai ïa ka jingdon jong kiba la khlad noh.”
U President ka Ukraine, U Volodymyr Zelensky, ula poi ha ka nongbah Belgrade jong ka Serbia, ha ka jingleit jngoh kaba nyngkong eh jongu. U dang ïakynduh ïa u President ka Serbia, u Aleksandar Vu?i?, na ka bynta ban ïakren halor ka jingïadei ha ka liang ka ioh ka kot, ka jingïada bad ka jingïadei bad ka European Union.
U Zelensky, u pyrshang ban tei ïa ka jingkyrshan kaba kham heh ïa ka Ukraine, tangba u Vu?i?, ula kyntait ban pyntreikam ïa ki jingpynjari kyndon ïa ka Russia.
Ka Serbia, ka pyrshang ban pyniasoh bad ka EU bad ka la ai jingiarap ia ka Ukraine bad ka la kular ban iarap ban tei biang ia ka, hadien ka thma.
Ha kaba sdang jong kane ka taiew, u Zelensky u la ong ba ka jingpynslem ban pdiang ïa ki tiar ïaleh pyrshah na ki paralok ka wanrah ïa ka “jingmynsaw bad jingpynjot kaba shyrkhei”, da kaba ong ba ka jingdon ïa ka jinglah ban khanglad kaba kham khlaiñ “ka lah ban pynim ïa ki jingim” ha ki jingshah thombor ba dang shen.
U president hadien u la ong ba ka jingpynbiang ia ki nongpynsangeh na ki paralok ka la “duna bha” mynta u snem.
Ka la jia hadien ba ka Ukraine ka la ther ïa ki ar tylli ki karkhana pynlang umphniang hapoh jong ka Russia ryngkat bad ki jhad kiba ïadei bad ka Moscow ha ka Black Sea, kaba u Zelensky u la ong ba ka dei ka jingthmu ban khanglad ïa ka jingïoh umphniang kaba ka Russia ka pyndonkam ban “bei pisa” ïa ka thma jong ka ha Ukraine.
Ki shipai jong ka Ukraine ki la ther ïa ki karkhana pynlang umphniang jong ka Russia ha Ilsky bad Syzran ha ka por ba ki thombor mynmiet, ha kaba ki la wanrah ïa ka jingpluh ha kine ki ar tylli ki karkhana, la ong ki heh shipai jong ka Ukraine ha ka sngi saitjaiñ.
Ka jingïakren pynbeit pud kaba dang shen hapdeng ka Ukraine bad ka Russia ka la tyrkhong, kaba la pynlong ïa ka jingïakynad kaba jur bha hapdeng baroh arliang mamla.
