Tokyo, Nailar:
Ka Hiroshima ha ka Sngi Palei, ka la kynmaw sngewlem ïa ka jingshah ther bom ba shyrkhei jong ka Japan ha ki 81 snem mynshwa bad ka la pynpaw ruh ïa ka jingpyrshah jur halor ki jingiakynad bad ki thma kiba jia ha kine ki sngi bad hajuh ka por ruh, ka la kyntu ba dei ban pynduh noh ïa ki tiar nuclear khnang ba kan kham pynduna ïa ka jingshah ktah jur jong kano- kano ka ri kaba shah thombor.
Shibun bah ki nongialam saiñ pyrthei ki kheiñ ïa katei jingpynsangeh ïa ki tiar nuclear kum ka mat kaba kongsan tam eh bad ki pynlong aiñ ïa ka jingleh donbor, kaba “shu pynkhihwin ïa ka pyrthei khlem ki tiar ialeh nuclear,” la ong u Matsui ha ka jingpynbna jingsuk jong u ha ka jingialang ha Hiroshima Peace Memorial Park. U la khot ruh ïa uwei pa uwei u nongshong shnong ban shim jinghikai na ki jingjia ba la dep bad ban shimkhia.
Kumba 50,000 ngut ki briew, kynthup ïa ki nongmihkhmat na kumba 120 tylli ki ri bad ki thain kynthup ïa ka America bad ka Iran, ki dei ban iashim bynta ha katei ka jinglehkmen. La pynlong ïa ka jingsngap jar kaba shi minit katba ka jingsawa jingsuk ka la sawa ha ka por 8:15 mynstep, ka por ba ka liengsuin B-29 jong ka US ka la pynhap ïa u bom ha katei ka nongbah.
Ka Myntri Rangbahduh ka Sanae Takaichi, kaba la leit sha katei ka jingkynmaw burom ha ka sien kaba nyngkong kum ka myntri rangbahduh, ka la ong ba kan shim ïa ka “jingmut kaba shisha” ban ioh ïa ka pyrthei ha kaba ym ju pyndonkam ïa ki tiar nuclear, hapoh ka phang jong ka jingiateh jong ka United Nations ban khanglad ïa ka jingsaphriang jong ki tiar nuclear.
