Jerusalem, Nailar:
U Benjamin Netanyahu, Myntri rangbahduh jong ka Israel, ula kyntait paidbah ia ka jingthmu pynbeit ban iasuk ha Gaza, kaba don 15 tylli ki mat, kaba la kyrshan da ka U.S., bad katei ka long ka jingpynphai kylla kaba khraw ia ka rukom treikam, kaba la wanrah da u President Donald Trump, ha u bnai ba ladep.
Haba kren ha ka jingïalang jong ka kynhun myntri ha ka Sngi U Blei, 9tarik Nailar 2026, u Netanyahu u la pynpaw ba ka Israel “kam pdiang” ïa kane ka kot kaba mynta. U la ban jur ba ki shipai Israel kin ym pynlong kano kano ka jingweng noh na ka Gaza Strip tad haduh ba ka Hamas kan da “pynduh ia ki tiar ialeh”- ka jingdonkam kaba u la batai kum ka jingpynduh noh pura ia ki tiar ialeh naduh kiba heh bad haduh kiba rit.
Ka jingthmu jong ka U.S., kaba la shna da ka “Board of Peace” ba la thung da u Trump, ka la ai jingmut mynshwa ban pyniasuk noh ïa ki Israel da kaba man ka por ryngkat bad ka aiti pyndem noh ki tiar ialeh jong ka Hamas. U Netanyahu u la kyntait shai ia kane ka rukom treikam kaba iadei dur, da kaba dawa ban pynduh noh ia ki tiar ialeh kum ka jingdonkam shwa na ka bynta kano kano ka jingleit jingwan jong ki shipai.
U Netanyahu u mad ïa ka jingshahpynbor kaba jur na ki paralok ba ïatreilang ban pynneh ïa ka jinglong kaba tyngeh ha shwa ka elekshon sha ka ïing dorbar thawaiñ kaba la buh ban long ha u bnai Risaw. Ki nongkynthoh hapoh ka sorkar jong u ki la kynthoh ba kano kano ka jingailad ha kaba ïadei bad ka jingsynshar ïa ka Gaza ka lah ban buh jingma ïa ka jingshngaiñ jong ka Israel.
Wat hapdeng ka jingkyntait jong ka Israel, ka Hamas ka la pynmih ïa ka jingpynbna kaba pynskhem biang ïa ka jingkular jong ka ïa ka lynti, da kaba kyntu ïa ki nongpynïasuk ban pynthikna ba baroh ki liang kin kohnguh ïa ka jingïateh kular, kynthup ïa ka jingpynsangeh pura ïa ki jingialeh jong ki shipai Israel bad ka jingpynphai biang ïa ki lad jingïarap ïa ki briew.
U Netanyahu u la kdew de ba ka Israel ka dang ïakren bad ka America, da kaba ong ba katba ki katto katne ki jingtyrwa jong ka America ki long kiba lah ban pdiang, kiwei pat ki long “ki bym lah ban pdiang,” bad ka Israel kan dang ïai bteng ban leh pyrshah ïa ki jingbyrngem ïa ki nongshong shnong jong ka haduh ban da pyndep ïa ki kyndon jong ka.
