Shillong, Nailar 11
Ka Sorkar Jylla ka la mynjur T. 23.27 klur na ka bynta ka jinglut jingsep ha ka jingtreikam bad ka jingpynbiang na ka bynta ka 39th National Games 2027, ha kaba ki jingpynkhreh ruh ki dangïaid shakhmat ha kaba ïadei bad ka jingkyrshan ïa ki nongïalehkai, ki synjuk ïalehkai, ki komiti bad ka jingïatreilang bad ki kynhun ïalehkai jong ka ri.
Ïa kane la shim ha ka jingïalang jong ka High Power Committee jong ka National Games Secretariat Society kaba la long ha ka sngi Ba-ar, ha kaba la ïatai haduh kumba hynñiew tylli ki mat kiba ïadei bad kane ka jingpynkhreh na ka bynta ka National Games.
U myntri ka tnad ïalehkai u Bah Wailadmiki Shylla u la ong ba kane ka jingmut ïa ka song pisa kaba T. 23.27 klur ka long na ka bynta baroh ki jingdonkam na ka bynta ka National Games Society, kynthup ïa ki jinglut jingsep kiba ïadei bad ki komiti, ki jingai jinghikai bad na ka bynta ki nongïarap mon bha, ki jingleit jngoh jong ki synjuk ïalehkai, ka Indian Olympic Association (IOA) bad ka tnat ïalehkai jong ka Sorkar Pdeng.
Nalor ka jingpynrung kam ïa ki samla kiba tbit (young professional) ban ïarap ïa ki komiti treikam bapher bapher.
Ha katei ka jingïalang ka la shim ruh ïa ka rai ban ai jingïarap pisa kyllum sha ki 30 tylli ki synjuk ïalehkai kiba pynkhreh ïa ka 39th National Games. Hynrei ïa ka pisa na ka bynta kawei pa kawei ka synjuk ym pat lah ban pynbeit pura.
U Bah Shylla u la ong ba ïa ka jingïarap yn pynbeit katkum ki jingdonkam ba kyrpang jong kawei pa kawei ka synjuk, da kaba kdew ba ki jingïalehkai ba ïatakhun para met (contact sports) kin donkam ïa ka jingkyrshan ba kham heh ha ka liang ka koit ka khiah ban ïa ki jingïalehkai kiba duna ki jingmynsaw.
Kane ka jingïarap la khmih lynti ba kan siew ïa ka bai leit ban wan bad kumjuh ruh ïa ki jingdonkam ha ka koit ka khiah na ki jingsumar, kynthup ïa ka physiotherapy bad ki tiar kiba ïadei bad kane ka jingdonkam.
Shuh shuh utei u Myntri u la ïathuh ruh ba ka sorkar ka la rai ruh ban ai bai bam ne ka stipend sha ki nongïalehkai kiba lah ban rung sha ka thup kaba khatduh na ka bynta ban mihkhmat ïa ka Jylla sha ka National Games.
La khmih lynti ba yn sa ithuh ïa ki kynhun ba khatduh (final team) ha u Naiwieng. Ka rai ban ai bai bam ka la long hadien ka jingkyrpad na ki nongïalehkai bad ki synjuk ïalehkai, khamtam eh kaba ïadei bad ki nongïalehkai kiba na ki longïing kiba duna ha ka ïoh ka kot.
Kane ka jingïalang ka la bthah ruh ïa ka tnad ka koit ka khiah ba kan buh ïa ki kyndon kiba kyrpang ban kyntiew ïa ka Meghalaya Health Insurance Scheme (MHIS) na ka bynta ki nongïalehkai, khamtam kito kiba ngat ha ki jingmynsaw ha ki jingïalehkai kiba ïatakhuh paramet.
Halor ka jingïatreilang bad ki synjuk ïalehkai jong ka ri, u Bah Wailadmiki u la ong ba ka Jylla ka la khmih lynti ban ïakynduh ïa u Myntri ka tnat ïalehkai ka Sorkar Pdeng bad ka IOA ha Delhi ban ïakren ïa ki tiar ki tar bad kiwei ki jingdonkam ha ka liang ka juk mynta. U la ong ba haduh mynta ym pat lah ban thaw ïa ka Game Technical Committee (GTCC) bad ka Jylla kan kyntu ïa ki bor ba dei khmih ba kin thaw noh kham kloi ïa ka.
Haba ïadei bad ka shap ne logo na ka bynta ka National Games, ka Jylla ka dangdon hapdeng ka jingïakren, ha kaba u Bah Shylla u la ong ba ki jingshna pynwan dur ïa katei ka shap ym pat i hun.
U la ong ba la bthah ïa ka tnad ba kan bishar bniah shuh shuh ha kaba ïadei bad ka shap khnang ba kan lah ban pyni kham bha ïa ka kolshor bad ka jinglong tynrai jong ka Jylla.
Ka Jylla kan phah ruh ïa ka kynhun ban leit sha kiwei pat ki jylla ka thaiñ shatei lammihngi ha ka taïew ba nyngkong jong u Nailur na ka bynta ban jurip ïa ki jaka ïalehkai bad ban bishar bniah ïa ka jingpynkhreh na ka bynta ki jingïalehkai kiba dangpynlong shabar kane ka Jylla, namar ba ïa ka National Games yn pynlong lang ha kylleng ki jylla ka thaiñ shatei lammihngi.
