Shillong, Nailar 11
Kumba 186 ngut ki khynnah kynthei bad shynrang na ki 12 tylli ki district jong ka Jylla ki la wan shim bynta ha ka lympung ïakob siatkhnam ba la tip kum ka Meghalaya State Archery Championship 2026, kaba la sdang ha ka sngi Ba-ar ha SAI Training Centre, NEHU.
Ïa kane ka lympung ïakop la pynlong da ka Archery Association of Meghalaya (AAM) ha ryngkat ka jingkyrshan lang da ka tnat ïalehkai ka Sorkar Jylla.
Ïa kane ka lympung ïakop ka ban neh lai sngi kynthih, la plie da ka Kong Isawanda Laloo (IAS), Secretary jong ka tnat ïalehkai ka Sorkar Jylla, ha kaba la sakhi lang da ka nongaibuit (advicer) ka AAM, Kong Matsiewdor War Nongbri (IAS), la don lang ruh u General Secretary ka Meghalaya State Olympic Association u Bah Finely L. Pariat, President bad Secretary ka AAM Bah P.B War Nongbri, Secretary Bah Robinson Ryntathiang, Asst Director Sports & Youth Affairs Bah Khroobok Passah, bad ïa ka jingïalang plie la pynïaid da u vice president ka AAM Bah EMH Passah.
Shwa ka jingïalang plie ka la don ruh ka jingpynïakhun ïa ka Qualification Indian Round ka kyrdan ïalehkai Sub-Junior ki kynthei bad shynrang bad hadien ka jingïalang plie la pynbud pat da ka jingpynïakhun ïa ka Individual Elimination ki Kynthei bad Shynrang (Indian Round ) Sub Junior.
Haba kren kum ka kongsan, ka Kong Isawanda ka la ong ba ïa mynta ka sorkar jylla bad ki synjuk ïalehkai ki la don hapdeng ka jingpynkhreh na ka bynta ka 39th National Games ka ban long ha u snem u ban wan ha kane ka Jylla.
Haba phai sha ki mawmer ka AAM, Kong Isawanda kam lah ban khlem da pyrto ïa ka jingsdang ban kiew jong kane ka jingïalehkai hadien ba ki nongïalehkai ka Jylla ki la lah ban khur ïa ki artylli ki takma ksiar ha ka 1st Khelo India Tribal Games bad ka la pynpaw ruh ïa ka jinglong ba la pynkhreh da ka Sorkar Jylla ban tei ïa ki artylli ki shlem saiñ dur ba kyrpang (Centres of Excellence) kawei ha ri lum Garo bad ri lum Khasi-Jaiñtia.
Katba na ka liang ka nongaibuit jong ka AAM Kong Matsiewdor War Nongbri (IAS), ka la pynpaw ba ka lympung bah ïalehkai Senior National Archery Championship kan sa wan kan long hangne hapoh ka jylla mynta u snem.
Nalor kata ka la wanrah ruh ïa ka parom sah kynmaw kaba da kumno ba kane ka jingïalehkai kaba la rim tam ha ka pyrthei, kaba haduh mynta mynne la lah ban ïai pynim bad tei tad ha ki spah snem kiba kham shadien ba la ithuh pura ïa ka kum ka jingïalehkai da ka International Olympic Committee ha ki snem 1960.
Haba phai pat sha la ka jong ka Jylla, u nongpyn khie im bad ba pynneh ïa kane ka jingïalehkai dei u Bah Woodward Sohliya (bam kwai ha dwar U Blei) bad u nongsaiñ dur ïa ka Indian Round.
Na ka liang ka Kong Matsiewdor, ka ai khublei ïa u Myntri Rangbah ka jylla u Conrad K Sangma bad kumjuh ïa u Myntri ba dei khmih ïa ka tnat ïalehkai, kiba la ailad ïa ka AAM ba kan lah ba kan don mynta ïa ki coach kiba kynsai bad kumjuh ïa ki performance director lem bad ban ïoh ban thied ïa ki tiar ïalehkai kum shi bynta ka jingpynkhreh na ka bynta ka National Games.
