UK, Nailar:
Katkum ki khubor, la iathuh ba ka ding kaba la pur bad ka la bam duh ruh ïa ki iing – ki sem baroh kiba don ha ka lynti ïaid jongka sha ka phang pdeng jong ka England, ha kaba, ki bor pyniaid ki la hap ban pynkynriah shnong noh ïa ki paidbah nongshong shnong na katei ka thaiñ hadien ba katei ka ri ka la ioh mad ïa ka suiñbneng kaba shit tam eh ha une u snem.
Hapdeng ka jingiakhun ban pynlip ïa katei ka ding kaba klang, la ong ba ki don bun ngtu kiba la mynsaw kynthup ïa 3 ngut ki nongpynlip ding ba la pynkit noh sha jakasumar hadien ba ki la mynsaw hapdeng ka jingïarap jongki bad 6 ngut ki paidbah ki la shah sumar namar ka jingsma bad uwei u khynnah la rah sha hospital, la iathuh ka tnat pynlip ding, da kaba bynrap ba la pynkynriah ïa ki briew na katei ka thaiñ.
Ym duna ïa hynriew tylli ki jaka kiba la shah ktah ha katei ka ding, la iathuh ki tnat iarap kyrkieh.
“Kane ka la long kawei na ki jingjia ba kongsan tam kaba ka West Midlands Fire Service ka la ju leit ban ïashim bynta,” ong u heh ophisar pynlip ding u Simon Tuhill ha ka jingïalang bad ki nongthoh khubor.
“Ka jingpynjot ka long kaba jur bha,” u la ong, da kaba kynnoh ïa ki jinglong “tinder dry” na ka bynta ka jingsaphriang stet.
Ka thaiñ West Midlands, ryngkat bad jan lai bynta na ka saw bynta jong ka England, ka la don ha ka jingkhriat hadien ba la bun taiew ka jingshit kaba jur bad ka jinghap slap kaba duna bha, kaba la pynjur ïa ka jingma na ka jingpluh ding.
Haduh mynta ka aiom lyiur, ki nongpynlip ding ki la ïakhun khamtam eh ïa ki jingpluh khlaw ha ki jaka nongkyndong bad ki jaka lum ha kylleng ka ri. U Andy Burnham, myntri rangbah duh jong ka ri, ula kyntu ïa ki nongdie marbam, ba kin khanglad ïa ka jingdie ïa ki jingbam barbecue, kiba pyndonkam tang shisien.
Namar la ong ba ka jingkhluit palat jong ka suiñbneng, ka la wanrah ïa ka jingpluh khlaw na ka por- sha ka por bad kiba bun tylli ki ri jong ka pyrthei, ki la ioh mad ïa kane kajuh ka jingeh ha man ki bor ba ka jinglong jong ka suiñbneng ka khluit haduh katta.
