Washington, Nailar:
U President ka America, U Donald Trump, u la ong ba ka America ka la ioh synshar hi ïa ka duriaw Hormuz bad ba un bat ïa ka bor synshar ha katei ka bynta katba ym pat don da kiwei pat ki jingpynbeit ne jingthmu. Ha ka jingthoh jong u hapoh ka rynsan Truth Social, u la ïaroh ïa ka jingjop jong ka jingkhang dam jong ki shipai duriaw jong ka US bad u la kynnoh ba la pynpaw ïa ka kum ka “kynroh nar” bad ba ka Iran kam lah ban leh eiei halor kane.
U Trump, u la kam trai bunsien ba ka US ka la ioh synshar hi ïa katei ka lynti duriaw kaba donkam bha, kaba long kaba kongsan na ka bynta ka jingtuid jong ka bor ding bad kiwei- kiwei ki mar khaïi lyngba ka Middle East, watla ka Islamic Republic ka la kyntait jur ïa katei ka jingpynbna jong ka US haduh mynta.
Ha ka jingshisha, ka Iran, ka thmu ban pynjari ïa ka rukom siew bai lutksan bad ka la thombor bunsien ïa ki jhad, kiba ka kynnoh, ba ki pyrshang ban ïaid lait ïa ka lynti kaba ka jied, kum ka jingkynthoh ïa ka thma jong ka US, kaba la sdang da u Trump, ha ka 28 tarik u Rymphang.
Sa shisien, u Trump u la thoh, “Ka U.S.A. ka don ka jingsynshar kaba pura halor ka duriaw bah Hormuz. Nga tharai ba ngin bat ïa ka! Ia ka jingkhang dam jong ki shipai duriaw jong ngi la khot, da baroh, “ka kynroh nar”, bad ym don ei ei kaba ka Iran ka lah ban leh halor kane.”
U nongialam jong ka Republican u la pynskhem ba ka Iran kam don shipai um bad shipai suin bad ba ki shipai jong ki kim don jingsiew. Ka kynhun pahara jong ka ri Islam, u la ong, ka la “shah pynjot bad ka la phet krad”.
U Trump u la pynkut ïa ka jingthoh jong u da kaba ong ba ka Iran kam dei shuh ka “nongleh be-ijot” jong ka Middle East bad u la ong, “Ka jingiaroh ïa U Allah!”
