Washington, Nailar:
U President ka United States, u Donald Trump, ha kane ka kynti u la pynbna ïa ka khajna kaba haduh 100% halor ki drone kiba khaïi shabar ri, kynthup ïa ki tiar khaïi kiba iadei bad ka jingpynbit- pynbiang ïa ki drone bad ka US ka la leh khnang ïa kane ha kum kane ka por, kum shi bynta ban tehlakam ïa ka jingiohnong bad ka jingkiew ha ka liang ka khaïi- ka pateng jong ka ri China.
U Trump u la pynksan ïa kane ka rai halor ki nongrim jong ka jingshngaiñ ka ri, katkum ka jingpynbna jong ka White House, kaba batai bniah ïa ka dor khajna kaba 100% halor ka jingwanrah ïa ki katto- katne ki liengsuiñ rit bym donkam nongñiah, kynthup ïa kito kiba don ka jingkhia haba kiew palat ïa ka 25 kilogram bad kiba don ïa ka jinglah ban iada ïa ka ri kum ki kor shim dur bad ki kor shim dur.
Katba, ïa ki drone kiba kham rit pat yn hap ban siew ïa ka khajna kaba 25%.
Katkum katei ka kyrwohm, la ong ba ka jingbuh khajna kan pynshlur ïa ka jingpynmih kham bun ïa kum kitei ki tiar ïakhun thma da lade hi hapoh ka ri bad kumjuh ruh ïa ki tiar ban pynbit- pynbiang ïa ki bad kane ka rai kan iarap ruh ban pynduna ïa ka jingshaniah ha kiwei pat ki kompeni kiba nabar.
Ka kompeni China, ka DJI, kaba la seng ha u snem 2006, ka la ioh ban bat palat ïa ka ar bynta na ka lai bynta jong ka iew jong ki drone ha ka pyrthei ha kine ki snem ba ladep, katkum ki katto katne ki jingwad bniah.
Kiba bun ki khajna thymmai ki sdang treikam ha ka 3 tarik u Nailur.
Ha ka taiew ba ladep, ka China ka la pynbna ïa ki jingkhang halor ka jingshalan ïa ki drone sha America bad ka la buh ïa ki hynriew tylli ki kompeni ha ka thup rong saw kum ka jingpynrem ïa ki jingkhang khaii pateng ba la pynjari da ka Washington halor ka jingpyntrei jubor bad ka jingeh ha ka jingïada ri.
Kane ka jingleh ka la jia hadien katto katne sngi ba ka US ka la buh khajna thymmai ïa ka China bad 59 tylli ki ri.
