UAE, Nailar:
Ka Abu Dhabi National Oil Company, ka iathuh ba ar tylli ki jhad jongka, ki la shah thombor, ha ka por ba ki dang iaid lyngba ïa ka duriaw Strait of Hormuz, ha ka janmiet jong ka Sngi Balang, ha kaba ym shym la don kano kano ka jingmynsaw, namar ba ka United Arab Emirates, ka kynnoh ba ka Iran, ka la pynlong ïa katei ka jing thombor.
Kane ka jingshah thombor ka dei ka sien kaba ar kaba kum kane ka jingjia kaba la ktah ïa ki liengsuiñ jong ka ADNOC hapoh shi taiew. Ha ka sngi Saitjain, ka UAE ka la pynrem ïa kaei kaba ka la ong ba ka dei ka jinghiar thma jong ka Iran ïa ka lieng kaba iadei bad ka kompeni umphniang jong ka jylla katba ka dang iaid lyngba katei ka duriaw.
Ka ADNOC ka la ong ba la lah ban tehlakam ïa katei ka jinglong jingman, ong ka khubor jong ka tnat pathai khubor jong ka UAE, ka WAM.
Ka tnat kam bar ri jong ka UAE, ka la pynrem ïa kaei kaba ka la khot ka “jingthombor kaba pyrshah jong ka Iran” ïa ki ar tylli ki lieng jong ka ADNOC. Ka la ong ba ki shipai jong ka Iran ki la leh ïa ki “kam runar” da kaba thmu ïa ki lieng khaii bad pyndonkam ïa ka duriaw kum ka atiar jong ka jingpynbor ha ka liang ka ioh ka kot ne ka jingpynbyrngia, kaba buh jingma beit ïa ka jingshong shngaiñ ha ka thaiñ bad ka jingïada ïa ka bor ding ha ka pyrthei.
Bad ka WAM ne ka tnat bar ri kim shym la ai jingtip bniah shaphang ki lieng, ki mar jong ki ne ki jingjulor kiba lah ban mih. Ym shym la don kano kano ka jingmynsaw.
Ym shym la don kano kano ka jingkren na ka tnat kam bar ri jong ka Iran ne ka IRGC.
Kumba shi bynta na ka san bynta jong ka umphniang bad ka lyer ba la pynlong um ha ka pyrthei ka la iaid lyngba ka lynti um kaba rit hapdeng ka Oman bad ka Iran shwa ka jingialeh. Naduh ba la sdang ka thma U.S. Israel bad ka Iran ha ka 28 tarik u Rymphang, ka jingkit jingbah ka la shah pynthut bunsien, kaba la pynkiew ïa ka dor kit mar bad ka la wanrah ïa ka jingeh ha ka liang ka jingshngain.
Ki shipai pahara jong ka Iran, ki la byrngem mynshwa ban leh pyrshah ïa ki jhad kiba ïaid lyngba katei ka duriaw, lada ki don jingïadei bad ki nongshun jong ka Tehran lane kim kohnguh ïa ki jingbthah jong ka Iran.
Ka ADNOC ka la ong ha ka sngi palei ba ka la shah ktah jur na kaei kaba ka la batai kum ki jingshah thombor khlem daw ïa ki briew bad ki mar ki mata jong ka, katba ka dang bteng ban pynbiang ïa ki jingdonkam jong ki nongthied ha ka “jinglong kaba jynjar bha.”
Ka ADNOC, ka kompeni umphniang jong ka jylla Abu Dhabi, ka dei kawei na ki kompeni pynmih bor ding kaba heh tam ha ka pyrthei bad ka shalan ïa ka umphniang, ka natural gas bad ki mar ba la pynkhuid sha kylleng ka pyrthei.
