Tehran, Nailar:
Ka kynhun ki nongbishar jong ka Iran, ka la pynbna ïa ka rai pyniap ha ka Sngi U Blei, ïa uwei u briew, uba la shah rai pynrem, namar ba u la rat naphang ïa ki katto katne ngut ki pulit da ka kali jong u, ha ka por ba don ka jingiakhih pyrshah sorkar ha u bnai Kyllalyngkot.
“U Shahram Sadeghi, uba la shah rai pyniap namar ba u la ai jingkyrshan ïa ka jingsynshar ki nong Zion bad ïa ka America, la dep rai pyniap noh ha kane ka step,” la ong ka Mizan Online website jong ka tnat bishar.
Ka la bynrap ruh ba utei u briew u la rat dusmon ïa katto- katne ngut ki ophisar pulit da ka kali jong u ha ka 8 tarik u Kyllalyngkot ha Karaj, shaphang sepngi jong ka Tehran, ha kaba hynriew ngut ki la mynsaw.
Ka jingiakhih kaba la mih nyngkong ha kaba kut jong u bnai Nohprah namar ka jingkiew dor jong ka jingim ka la nang kiew stet sha ki jingiakhih pyrshah sorkar kiba la saphriang bha kiba la poi sha ka thong ha ka 8 bad 9 tarik u Kyllalyngkot.
Ki bor synshar jong ka Iran, ki la iathuh ba palat 3,000 ngut ki la iap, da kaba pynshong nongrim ïa katei ka jingshah thombor ha ki “kam lehnoh” ba la pynlong da ka America bad ka Israel, katba ki kynhun iada ïa ka hok longbriew manbriew, kiba don shabar ri, ki pynskhem ba ki bor pahara, ki la siat ïa ki nongiakhih.
Ka jingshah pyniap ha Iran, ka la kiew naduh ba la sdang ka thma Middle East, kaba la khie ha ka 28 tarik
u Rymphang ryngkat bad ka jinghiar thma jong ka US bad ka Israel, pyrshah ïa ka Iran. Ka jingbun ki jingshah pyniap briew ka la iadei bad ki jingiakhih.
Ki bor pyniaid ki la pyniap ym duna ïa ka 1,639 ngut ki briew ha u snem ba la dep, kaba dei ka jingkhein kaba heh bha naduh u snem 1989, katkum ka jingiathuh jong ka Iran Human Rights, ka seng trei mon sngewbha kaba don ha Norway bad ka Together Against the Death Penalty (ECPM), kaba don ka jaka treikam jong ka ha Paris.
Kat kum ka Amnesty International, ka Iran, ka pynlong ïa ka ri kaba ar, kaba bun eh ki kam pynïap briew, na kino kino ki ri, hadien ka China.
